İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 288 Hüküm no: 203 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yedikule dışındaki debbağların kethüdâlığına Seyyid el-Hâc Ahmed b. İbrahim’in tayini Mahmiye-i İstanbul’da Yedikule hâricinde vâki‘ debbâğ tâifesinin mu‘ayyene ile kethüdâları olan es-Seyyid Ahmed kasab tâifesinin mallarını cem‘ ve tahsîl eylemekde ihmâl ve tekâsül eylediğinden mâ‘adâ kethüdâlığa rağbet etmeyip, esnâfı beyninde hilâf-ı nizâm hareket etmekle, mezbûr Seyyid Ahmed ref‘ ve kethüdâlık-ı mezbûr hırfet-i mezkûre erbâbının muhtârları olup her vechile mahall ü müstahık olan işbu râfi‘u tevkī‘-i refî‘ü’ş-şân-ı hâkānî kıdvetü’l-emâsil ve’l-akrân es-Seyyid el-Hâc Ahmed b. İbrahim -zîde kadruhû-ya tevcîh olunup mahalline kayd ve yedine berât-ı âlîşânım verilmek recâsına akzâ kuzâtü’l-müslimîn İstanbul kadısı Kethüdâzâde Mevlânâ Mehmed -zîdet fezâiluhû- i‘lâm etmekle Anadolu muhâsebesi kuyûdâtına mürâca‘at olundukda kethüdâlık-ı mezbûr el-Hâc Mustafa b. Yusuf mahlûlünden İsmail b. İbrahim üzerinde olduğu derkenâr olunmakla, mûcebince ref‘inden tevcîh ve müceddeden mahalline kayd ve berât verilmek fermânım olmağın, hakkında mezîd-i inâyet-i pâdişâhânem zuhûra getirip, Mevlânâ-yı mûmâ-ileyhin i‘lâmı ve bin yüz otuz dokuz senesi Saferü’l-hayrı’nın yirmi sekizinci günü târihiyle müverrah verilen ruûs-ı hümâyûnum [61b] mûcebince bu berât-ı hümâyûn-ı şevket-makrûnu verdim ve buyurdum ki mezbûr es-Seyyid el-Hâc Ahmed b. İbrahim -zîde kadruhû- varıp ref‘ olunan merkūm yerine esnâf-ı mezkûra vech-i meşrûh üzre kethüdâ olup edâ-i hizmet eyledikden sonra bundan evvel kethüdâ olanlar vazîfe-i mu‘ayyenesine ne minvâl üzre mutasarrıf olagelmişler ise yine ol minvâl üzre mutasarrıf ola, ol bâbda taraf-ı âhardan ferd dahl ü ta‘arruz kılmayalar şöyle bileler alâmet-i şerîfe i‘timâd kılalar. Tahrîren fi’l-yevmi’l-hâdî aşer min şehri Rebî‘ilevvel sene tis‘a ve selâsîn ve mi’e ve elf. Be makām-ı Kostantıniyye el-mahrûse.