İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 289 Hüküm no: 206 Orijinal metin no: [61b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul abâcı ve bezzâz esnafı ile terzi esnafının birbirlerinin işlerine müdahale etmemeleri Ma‘rûz-ı dâ‘î-i devletleridir ki Mahmiye-i İstanbul’da abacı ve bezzâzlar kethüdâsı İsmail Çelebi b. el-Hâc Mustafa ve yiğitbaşıları es-Seyyid el-Hâc İsmail b. es-Seyyid Abdülkerim meclis-i şer‘de mahmiye-i mezbûrede terziler kethüdâsı es-Seyyid Ali b. Hasan ve yiğitbaşıları Yusuf b. Abdullah mahzarlarında kadîmü’l-eyyâmdan ilâ hâze’l-ân mahmiye-i mezbûrede ve Zenneciler sûkunda ve Karagümrük ve Ayvansaray kapısı kurbunda ve Ayazmakapısı kurbunda olan abacı tâifesi, sâir terziler misillü destgâh ta‘bîr olunur kebîr tahta ve ütü isti‘mâl edip Arnavud ve Bulgar tâifesine mahsûs olup onların lâbis ve isti‘mâl eyledikleri gerek çuka ve gerek bogasiden bağır yeleği ve entari ve çintiyan biçip ve dikip ütüleye gelmiş iken mezbûrûn terzi tâifesi zikr olunan destgâh tahtası ve ütü bizimdir sizin alâkanız yokdur deyû bî-vech müdâhale ve mümâna‘at eylediklerinde hakīkat-i hâl vukūfu olan Bitpazarı Kethüdâsı ve yiğitbaşıları ve oturakçı tâifesi ve tüfenkçi ve kılıççı tâifesinden tefahhus ve istifsâr olundukda fi’l-hakīka kadîmü’l-eyyâmdan abacı tâifesi dahi terziler misillü destgâh tahtası ve ütü isti‘mâl ede gelmişlerdir deyû ba‘de’l-ihbâr abacı tâifesi ber vech-i muharrer Arnavud [62a] ve Bulgar tâifelerinin lâbis ve isti‘mâl eyledikleri gerek çuka ve gerek bogasi ve gerek bogasi bağır yeleği ve entari ve çintiyan biçip ve dikip ve ütülemesine terzi tâifesi müdâhale ve muhâlefet etmeyip, onlar dahi bu şehrin lâbis ve isti‘mâl eyledikleri sâir emti‘a-i mütenevvi‘aya kat‘â müdâhale ve mu‘âraza ve vaz‘-ı yed etmemek üzre beynlerine nizâm verilip eğer ba‘de’l-yevm hilâf-ı nizâm terzi tâifesinin hayâtat eyledikleri emti‘a-i mütenevvi‘aya vaz‘-ı yed ederlerse kethüdâları azl ve her kimin elinde zuhûr ederse cezâsı verilmek üzre beynlerinde terâzî ve tevâfuk eyledikleri huzûr-ı âlîlerine i‘lâm olundu. Bâkī fermân men lehü’l-emrindir. Fî 15 Rebî‘ilevvel sene [1]139.