İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 304 Hüküm no: 222 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Odunkapısı’nda Yenicami yakınında ekmek satışı için yeni bir iskemle tahsisi talebi Allahü hasbî Mâ fîhi kemâ fîh, harrerehu’l-fakīr ileyhi sübhânehû azze şânühû Kethüdâzâde Mehmed el-kadı bi Dâri’s-saltanati’l-aliyye -ufiye anhu- Husûs-ı âti’z-zikrin mahallinde ketb ü tahrîri için taraf-ı şer‘-i enverden ayak nâibimiz el-Hâc İbrahim Efendi irsâl olunup ol dahi mahmiye-i İstanbul hısnı ebvâbından Odunkapısı hâricinde vâki‘ mîrî sebzehâneye varıp zeyl-i vesîkada muharrerü’l-esâmî olan müslimîn huzûrlarında akd-i meclis-i şer‘-i hatîr eyledikde bâb-ı mezkûr hâricinde olan ehl-i dekâkîn ve sefîne reislerinden cemm-i gafîr ve cem‘-i kesîr meclis-i ma‘kūd-ı mezbûrda takrîr-i kelâm ve ta‘bîr ani’l-merâm edip Odunkapısı iskelesinde nân-ı azîz bey‘ olunacak bir iskemle olmayıp gemici tâifesi ve sâir misâfirîn ba‘de’l-mağrib ebvâb-ı kal‘a-i İstanbul mesdûd oldukda nân-ı azîze eşedd-i ihtiyâc ile muhtâc olmalarıyla iskele-i mezbûrede tulumbacı dükkânı kurbunda vâki‘ bir kıt‘a hâlî yer mezbelelik olup eyyâm-ı sayfda ta‘affün eyledikde ibâdullâha mutazarrır olmalarıyla mahall-i mezbûr tathîr ve yerine bir iskemle vaz‘ olunup Balıkpazarı kapısı dâhilinde olan Yeni câmi‘ fırınında tabh olunan nân-ı azîzden iskemle-i mezbûrede ibâdullâha müstevfâ nân-ı azîz bey‘ olunmak her vechile enseb ve elzem olup bir ferde zararı dahi yokdur deyû her birerleri iltimâs eylemeleriyle mahall-i mezbûr kazûrât ve kamâmdan tathîr olunup yerine bir iskemle vaz‘ olunup bâlâda mezkûr olan Yeni câmi‘ fırınında tabh olunan nân-ı azîzden iskemle-i mezbûrede bey‘ eylemek üzre fırın-ı mezkûr müste’ciri ( ) zimmîye tenbîh eylediğin nâib-i mezbûr mahallinde istimâ‘ ve ma‘an irsâl olunan ümenâ-i şer‘-i şerîf ile meclis-i şer‘a gelip alâ vukū‘ihî inhâ ve takrîr etmeğin, mûcebiyle ba‘de’t-tenbîh, mâ vaka‘a bi’t-taleb ketb olundu. Fî 15 min şehri Rebî‘ilevvel sene [1]139. Şuhûdü’l-hâl: Kethüdâ-yı habbâzân Mehmed Ağa b. Ali, yiğitbaşı Ömer Çelebi b. Hacı Mehmed, salcı Ali Çelebi b. Mahmud, kethüdâ-yı Beyzâ Hacı İbrahim, çardak çorbacısı Ömer Ağa, pazarbaşı Mehmed Ağa b. Hacı Hüseyin, diğer pazarbaşı Mehmed Ağa, el-Hâc Mustafa b. el-Hâc Ali, el-Hâc İbrahim b. Mustafa, el-Hâc Mehmed b. İsmail, el-Hâc Hüseyin b. Hasan, el-Hâc Abdünnebi b. Abdülganî, Mehmed Yazıcı b. Nurullah, el-Hâc Mustafa b. Ahmed, el-Hâc İsmail b. Ahmed, el-Hâc Mehmed Boyacızâde, Kürdzâde Hacı Musa, el-Hâc Mehmed Davudzâde, bölükbaşı Hasan Beşe, el-Hâc Ahmed b. Abdullah, bakkal Hacı Hasan b. Abdullah, el-Hâc Hüseyin İzmirî, Hüseyin Beşe Usta-i Çardak, bakkal el-Hâc Halil, es-Seyyid Mustafa Beşe, el-Hâc İsmail İzmirî.