İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 303 Hüküm no: 221 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Odunkapısı’nda Yenicami yakınında ekmek satışı için yeni bir iskemle tahsisi Ma‘rûz-ı dâ‘î-i devletleridir ki Zikri âtî husûsu mahallinde tefahhus ve istihbâr için taraf-ı şer‘den irsâl olunan ayak nâibimiz el-Hâc İbrahim Efendi, mahmiye-i İstanbul hısnı ebvâbından Odunkapısı hâricinde vâki‘ mîrî sebzehâneye varıp ba‘de akdi’l-meclis, mahall-i mezbûrda olan ehl-i dekâkîn ve sefîne reislerinden cem‘-i gafîr kimesnelerden tefahhus ve istifsâr eyledikde bâb-ı mezkûr hâricinde Odunkapısı iskelesinde ekmekçi iskemlesi olmayıp ba‘de’l-mağrib kal‘a kapıları sed olundukda mellâh tâifesi ve sâir misâfirîn nân-ı azîze eşedd-i ihtiyâc ile muhtâclar olmağın, iskele-i mezbûrede tulumbacı dükkânı kurbunda bir mikdâr hâlî mezbelelik yerde eyyâm-ı sayfda te‘affün etmekle ibâdullâh mutazarrır olmağın, mahall-i mezbûr pâk ve tathîr olunup yerine bir ekmekçi iskemlesi vaz‘ ve Balıkpazarı kapısı dâhilinde olan Yeni câmi‘ kurbunda tabh olunan nân-ı azîzden ekmek getirilip, ibâdullâha müstevfâ bey‘ olunmak her vechile lâzım ve mühim ve enseb ve evlâdır deyû her biri inhâ ve takrîrlerini nâib-i mezbûr mahallinde tahrîr, ba‘dehû meclis-i şer‘a gelip inhâ eyledi[kde] iskele-i mezbûre mukaddemâ tahrîr olunan defter-i cedîd idhâl ve düstûrü’l-amel kılınmak için mukaddemâ fermân-ı âlî ile yedinde olan iskemlelere ilhâk ve mecmû‘u bir emr-i âlî olmak için tuğrâ-yı garrâ-yı sultânî ile muhallâ hükm-i hümâyûn ihsân buyurulmak bâbında fermân men lehü’l-emrindir. Fî 20 Rebî‘ilevvel sene [1]139.