İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 306 Hüküm no: 224 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Esirhanı’nda kazak bekçisi olmak isteyen Ali’nin isteğinin kabul edilmediği Bâ mühr-i hazret-i Efendi Ma‘rûz-ı dâ‘î-i devletleridir ki Mahmiye-i İstanbul’da Esirhanı demekle ma‘rûf handa müceddeden mahsûs kazak bekçisi nasb ve ta‘yîn olunmak üzre Ali nâm kimesne arzuhâl eyledikde husûs-ı mezbûr bâ fermân-ı âlî hâlâ esirciler kethüdâsı İsmail Ağa ve çavuşları Sâlih ve müsin ve ihtiyâr ustalarından olup cerîdede isimleri mazbût otuz nefer kimesnelerden tefahhus olundukda feth-i hâkānîden ilâ hâze’l-ân sûk-ı mezbûrda mahsûs ve mu‘ayyen kazak bekçisi olmayıp sûk-ı mezbûra bey‘ için gerek ashâbı bi’n-nefs getirip ve gerek emâneten gönderilip bey‘ olunmayıp eyyâm-ı âtîye kalan kazakları hân-ı mezbûrda gecelemeyip, yedinde bulunan kimesne zabtına kādir ise kendi götürüp ve eğer zabtına kādir olmayıp âhara îdâ‘ iktizâ ederse cümlenin re’y ü ittifâk ve ihtiyâr ve kethüdâ ma‘rifeti ile kazakçı ta‘bîr olunan işbu hâzırûn bi’l-meclis el-Hâc Osman ve el-Hâc Cafer ve Odabaşı Ömer’e teslîm, onlar dahi kârgîr handa zabt ve hıfz edegelip hâricden kazakçı nasb ve ta‘yîn olagelmemişdir husûs-ı mezbûr müstetbi‘ olup giderek gulâm ve bikr câriye ve mevlâda câriye ve Arab câriyelere bekçileri îcâr olunup her birine başka başka bekçi oluruz deyû umûr-ı sûk-ı mezbûr muhtel ve müşevveş ve ibâdullâha zarar-ı azîm mukarrerdir mezbûr Ali’nin murâdı celb-i mâl ile ibâdullâhı ızrâr ve iz‘âcdır, men‘ olunur ise indillâh müsâb ve me’cûr olurlar deyû her biri inhâ eylediler. Fermân men lehü’l-emrindir. Fî 17 Rebî‘ilevvel sene [1]139.