İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 328 Hüküm no: 245 Orijinal metin no: [73a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yenisaray ağası Yusuf Ağa’nın Süleyman Haseki’den alacağını ertelediği Ma‘rûz Bâ mühr-i hazret-i Efendi Hâlâ Saray-ı cedîd-i sultânî ağası olup derûn-ı arzuhâlde mezkûrü’l-ism Yusuf Ağa tarafından sâbitü’l-vekâle vekîli olan Ali Bey’in müvekkil-i mûmâ-ileyhin sâhib-i arzuhâl Süleyman Haseki zimmetinde semen-i mebî‘den bâ temessük beş yüz guruş [alacağı] olup hâlâ ve def‘aten edâya kudreti olmamakla, meblağ-ı mezbûrdan müvekkil-i mûmâ-ileyh Yusuf Ağa’ya târih-i i‘lâmdan beher ay ikişer guruş verip meblağ-ı mezbûru târih-i mezbûrdan iki yüz elli ay tamâmına müvekkil-i mûmâ-ileyhe tamâmen edâ ve teslîm etmek üzre mezbûr Süleyman Haseki’yi te’cîl ve taksît eyledikde ol dahi kabûl ve ber vech-i muharrer edâya ta‘ahhüd eylediği tescîl ve bi’l-iltimâs huzûr-ı âlîlerine i‘lâm olundu. Fî 5 Rebî‘ilâhir sene [1]139.