İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 331 Hüküm no: 248 Orijinal metin no: [74a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahırkapı’daki kayıkçıların kethüdâlığına Mehmed Beşe’nin getirildiği Allahü hasbî Mâ fîhi kemâ fîh, harrerehu’l-fakīr ileyhi sübhânehû azze şânühû Kethüdâzâde Mehmed el-kadı bi Dâri’s-saltanati’l-aliyye -ufiye anhu- Mahmiye-i İstanbul’da Ahırkapı iskelesinde olan kayıkçı tâifesinden İbrahim b. Resûl ve Hüseyin b. Mehmed ve Mahmud b. Hüseyin ve Ahmed b. Mustafa ve Abdullah b. Hasan ve İsmail b. Mehmed ve Halil b. Ebûbekir ve Ahmed b. Ömer nâm kimesne mahzarında her biri takrîr-i kelâm ve ta‘bîr ani’l-merâm edip mukaddemâ bizim ihtiyârımız ile kethüdâmız olan Ali Beşe b. Beşir nâm kimesne tama‘-ı hâmından nâşî umûrumuzu muhtel ve müşevveş etmekle mezbûrun ef‘âl ve akvâlinden cümlemiz mutazarrır olmamız ile mezbûr Ali’yi kethüdâlıkdan ihrâc ve üzerimize merkūm Mehmed Beşe’yi de hâlinden râzı ve şükrân olduğumuza binâen kethüdâ ihtiyâr eyledik hâlâ mezbûr Mehmed Beşe savb-ı şer‘den dahi üzerimize kethüdâ nasb ve ta‘yîn olunmak matlûbumuzdur dediklerinde kaziyye vech-i muharrer üzre olduğunu vukūfu olan bî-garaz müslimîn ihbâr etmeleriyle gāib-i mezbûr Ali kethüdâlık-ı mezbûrdan ihrâc ve yerine tâife-i mezbûre üzerlerine mezbûr Mehmed Beşe kıbel-i şer‘den kethüdâ nasb ve ta‘yîn olundukda ol dahi kabûl ve hizmet-i lâzımesin kemâ yenbağī edâya ta‘ahhüd ve iltizâm etmeğin, mâ hüve’l-vâki‘ bi’t-taleb ketb olundu. Fî 8 Rebî‘ilâhir sene [1]139. [Şuhûdü’l-hâl]: Mehmed Ağa b. Mehmed, Eyyûb Efendi b. İbrahim, Sâlih b. Süleyman, Mehmed Çelebi b. Abdullah.