İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 330 Hüküm no: 247 Orijinal metin no: [73b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Balıkpazarı, Zindankapısı ve Odunkapısı’ndaki çarşılarda üç yeni iskemle tahsisi El-emru kemâ uhbirtü-bih nemekahü’l-fakīr ileyhi azze şânühû Mustafa en-nâib bi mahkemeti Ahî Çelebi bi med[îne-i] Kostantıniyye -ufiye anhu- Husûs-ı âti’z-zikrin mahallinde tahrîr için bi’t-taleb savb-ı şer‘den irsâl olunan Mustafa Efendi mahmiye-i İstanbul’da ihtisâb mukāta‘ası ümenâsına mahsûs olan çardakda emîn odasına varıp zeyl-i sahîfede muharrerü’l-esâmî müslimîn huzûrlarında akd-i meclis-i şer‘-i kavîm ettikde, mahmiye-i mezbûre hısnı ebvâbından Balıkpazarı ve Zindan ve Odunkapıları hâriclerinde vâki‘ esvâk ahâlîsinden müsin ve ihtiyâr ve mevsûkun-bihim ve mu‘temedün-aleyhim olan kimesnelerden cemm-i gafîr ve cem‘-i kesîr meclis-i ma‘kūd-ı mezkûrda her biri takrîr-i kelâm ve ta‘bîr ani’l-merâm edip işbu çardağa mahsûs olan iskemleye ve kurbunda pirinç bey‘ olunan sûka ve şırahâne semtinde Tulumbacı limanına akreb sevâhil-i bahrden deryâya dökülen mezâbil mürûr-ı ezmine ile iskele-i mezbûra mülâsık tûlen beş ve arzen dört zirâ‘ ve sûk-ı mezkûra mülâsık tûlen dört ve arzen iki zirâ‘ ve liman-ı mezkûra mülâsık tûlen dört ve arzen iki zirâ‘ mikdârı mahallerin üzerlerine atılan lâşe dahi zikr olunan mahallerde kalıp ta‘affün edip râyiha-i kerîhasından ol mahallerden mürûr eden nâs müteezzîler olduklarını esvâk-ı mezkûre ahâlîsi ve sâirleri bi’l-icmâ‘ ve’l-ittifâk mahmiye-i mezbûrede hâlâ hâkim-i hâsim-i şerî‘at-i garrâ olan a‘lemü’l-ulemâ’i’l-izâm efdalü’l-fuzalâi’l-fihâm Efendi hazretlerine haber verip zikr olunan mahzûrların bi’l-külliye indifâ‘ı zikr olunan üç mahallede ekmekçi iskemleleri binâ ve vaz‘ olunup zikr olunan mahallere karîb Balıkpazarı kapısı dâhilinde Yeni câmi‘ fırını demekle ma‘rûf fırında tabh olunan ekmeklerden zikr olunan iskemlelerde ekmek bey‘ olunmak enseb ve evlâ olup ve husûs-ı mezbûr nâsa nef‘-i mahz idiğini bundan akdem îzân ve ifâde ve husûs-ı mezkûrun husûlünü recâ ve iltimâs eylemeleriyle husûs-ı mezkûr Dîvân-ı âlî’ye i‘lâm olundukda mûcebince zikr olunan mahallere üç aded ekmekçi iskemleleri binâ ve zarar-ı mezkûr def‘ olunmak bâbında fermân-ı âlî sâdır olunmağın, binâen alâ zâlik müşârün-ileyh Efendi hazretleri dahi mallarıyla zikr olunan üç mahalle ekmekçi iskemleleri binâ ve zikr olunan fırında tabh olunan ekmeklerden ekmek bey‘ ettirdikden sonra sâbıku’z-zikr iskemleye mülâsık olan mahalde binâ olunan iskemle mukāta‘a-i mezbûre mutasarrıfı yediyle ancak müşâhedeten yüz yirmi akçeye îcâr ve hâsıla olan ücreti çardak-ı mezkûr huddâmının suyuna ve sakasına harc ve sarf olunmak üzre ve mâ‘adâ mârrü’z-zikr sûka ve limana mülâsık olan mahallerde binâ olunan iki aded iskemle dahi Dergâh-ı âlî -dâme mahfûfen bi’l-me‘âlî- yeniçerilerinin elli altıncı bölüğe mahsûs olan oda çorbacısı yediyle yine ancak müşâhedeten yüz yirmişer akçeye îcâr ve hâsıla olan ücretleri oda-i mezkûr ve zikr olunan çardağın deryâ tarafında tahtında vâki‘ ahâlî-i mezkûreye mahsûs olan kolluğun kanâdîl ve dühününe harc ve sarf olunmak üzre müşârün-ileyh Efendi hazretleri kendi rızâlarıyla ta‘yîn ve tahsîs etmeleriyle hâlâ zikr olunan iskemlelerin her biri icâre-i mezkûreleriyle îcâr ve hâsıla olan ücretleri mesârif-i mu‘ayyene-i mezkûreye sarf olunduğunu ihbâr eylediklerini bâ‘is-i hâze’l-vesîka hâlâ mukāta‘a-i mezbûre emîni İbrahim Ağa b. Mehmed [74a] ve oda-i mezkûr çorbacısı Ömer Ağa b. Mehmed iltimâslarıyla mezkûr Mustafa Efendi mahallinde tahrîr, ba‘dehû irsâl olunan Mehmed Çelebi b. Ali ve İvaz Çelebi b. Abdullah ile meclis-i şer‘a gelip vukūu üzre inhâ ve takrîr etmeğin, mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Rebî‘ilevvel li sene tis‘a ve selâsîn ve mi’e ve elf. [Şuhûdü’l-hâl]: Pirinççiler kethüdâsı Mehmed Çelebi b. Mustafa, pazarbaşı Haşek? Mehmed Ağa b. el-Hâc Hüseyin, pazarbaşı Ter Mehmed Ağa ibn-i el-Hâc Ahmed, yumurtacılar kethüdâsı el-Hâc Hüseyin, yumurtacı el-Hâc Ahmed b. İbrahim, yumurtacı el-Hâc Mehmed b. İsmail, yumurtacı Sâlih Çelebi b. Ali, yumurtacı Ali Beşe b. Ahmed, Hüseyin Beşe b. Ahmed, yumurtacı Yusuf Beşe b. Abdullah, yumurtacı el-Hâc Mustafa b. Mehmed, el-Hâc Nebi b. Abdülganî, Mehmed Yazıcı b. Nurullah, el-Hâc Mustafa b. Ahmed, Mustafa Yazıcı b. Mehmed, el-Hâc Ahmed b. Hüseyin, Mustafa Beşe b. Ahmed, ekmekçiler kethüdâsı Mehmed Ağa b. Ali, yiğitbaşı Ömer Çelebi b. Mehmed, sâyıcı Ali Çelebi b. Mahmud, Hüseyin usta b. Mehmed, Köroğluzâde Ahmed Reis, Hüseyin Reis b. Ali, Mustafa Reis b. Mehmed, Ömer Beşe b. Abdullah, Hasan Bölükbaşı b. Abdullah, Süleyman Bölükbaşı b. Abdullah, Mehmed Bölükbaşı b. Abdullah, el-Hâc Mehmed Bölükbaşı b. Davud, el-Hâc Ahmed b. Abdullah, el-Hâc Hasan b. Abdullah, İsmail Beşe b. Mehmed, Mehmed Bey b. Ali, el-Hâc Mustafa b. el-Hâc Ali.