İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 336 Hüküm no: 253 Orijinal metin no: [75b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tüccar kethüdâsı İsmail b. el-Hâc Mustafa’nın işinin ehli olduğunun anlaşıldığı Ma‘rûz-ı dâ‘î-i devletleridir ki Mahmiye-i İstanbul’da tâcirler hırfetinin bâ berât-ı âlî kethüdâsı olan İsmail b. el-Hâc Mustafa nâm kimesnenin bâ fermân-ı âlî taleb ve iltimâsıyla keyfiyyet-i ahvâli hırfet-i mezkûre erbâbından olup vukūf-ı tâmları olan mazbûtü’l-esâmî kırk dokuz nefer kimesnelerden tefahhus olundukda fi’l-hakīka kethüdâ-yı mezbûr İsmail kendi ırzıyla me’lûf ve meşgūl ve hırfetimiz fukarâsına nâfi‘ ve hayır işlerimize sâ‘î olup ve’l-hâsıl dâimâ hüsn-i hâl üzre olmağla cümlemiz merkūmun evzâ‘ ve etvârından her vechile râzı ve hoşnûdlarız deyû her biri mezbûrun hüsn-i hâlini meclis-i şer‘de alâ tarîki’ş-şehâde ihbâr eylediklerinden sonra ba‘zı ashâb-ı ağrâz kethüdâlık-ı mezbûru merkūmun üzerinden hilâf-ı inhâ ref‘ ve kendi üzerine ettirmek kasdında olmağla fîmâ ba‘d hırfet-i mezkûre erbâbı cümlesi hâzır oldukları hâlde mürâfa‘a olmadıkça mahallinden derkenâr olunmamak üzre kaydına şerh verilmek bâbında fermân-ı âlî recâsında oldukları bi’l-iltimâs huzûr-ı âlîlerine i‘lâm olundu. Bâkī fermân men lehü’l-emrindir. Fî 19 Rebî‘ilâhir sene [1]139.