İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 335 Hüküm no: 252 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kılabdancı Delvet v. Ovanes’e boşa çıkan bir çıkrık olduğunda verilmesi Ma‘rûz-ı dâ‘îleridir ki Mahmiye-i İstanbul’da Sîmkeşhâne’de olan kılâbdancı tâifesinden sâhib-i arzuhâl Delvet v. Ovanes nâm zimmî meclis-i şer‘de Simkeşbaşı es-Seyyid el-Hâc Süleyman Ağa ve kethüdâ el-Hâc Mustafa Ağa ve şeyhleri İsmail Efendi ve yiğitbaşı Ali Ağa ve ustalarından Ohan ve Agya ve Ohannes ve Aritun ve sâirleri muvâcehelerinde, ben Sîmkeşhâne-i mezbûrede pîr-perver usta kılâbdancı olup san‘atımı işler iken bi’l-iktizâ diyâr-ı âhara gidip hâlâ geldiğimde ke’l-evvel san‘atımı işlemek murâd eylediğimde, mezbûrlar bilâ-vech mâni‘ olurlar deyû da‘vâ ettikde mezbûrûn cevâblarında fi’l-hakīka müdde‘î-i mezbûr Delvet pîr-perver usta kılâbdancı olup mukaddemâ san‘atını işler iken çıkrık ta‘bîr olunur âletini alıp taşra çıkarıp san‘at-ı mezbûreden bi’l-külliye fâriğ oldukdan sonra san‘at-ı mezbûre erbâbı bâ fermân-ı âlî tahrîr olundukda kârhâne-i mezbûrede cem‘an seksen beş çıkrık olup her birini birer ustaya ta‘yîn ve tahsîs ve seksen beş çıkrıkdan ziyâde çıkrık ihdâs olunmamak üzre beynlerine nizâm verilip ba‘dehû Bursa’dan gelen beyaz kılâbdancılar için bâ fermân-ı âlî üç aded çıkrık dahi ihdâs ve Bursa’dan gelen beyaz kılabdancılara ta‘yîn ve tahsîs olunmuşdu hâlâ müdde‘î-i mezbûr gelip san‘at-ı mezbûra rağbet ve san‘atını ke’l-evvel işlemek murâd eylediğinde hâlî çıkrık olmamakla bir usta yanında halîfelik edip iktisâb ve ta‘ayyüş eder deyû cevâb verdiklerinden sonra ba‘de’l-yevm zikr olunan seksen beş çıkrıkdan bir çıkrık mahlûl oldukda, müdde‘î-i mezbûr Delvet’e verilip sâir ustalar misillü müstakillen san‘atını işlemek üzre beynlerinde terâzî ve tevâfuk ve ahd ü mîsâk eyledikleri tescîl-i şer‘î ve huzûr-ı âlîlerine i‘lâm olundu. El-emru li men lehü’l-emr. Fî 17 Rebî‘ilâhir sene [1]139.