İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 337 Hüküm no: 255 Orijinal metin no: [76a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tulumbacı şeridi işleyenlerin nizamları Şerid işleyen tâifenin hücceti Allahü hasbî El-emru kemâ fîhi harrerehu’l-fakīr ileyhi sübhânehû azze şânühû Kethüdâzâde Mehmed el-kadı bi Dâri’s-saltanati’l-aliyye -ufiye anhu- Mahmiye-i İstanbul’da tulumbacı şeridi demekle beyne’n-nâs meşhûr olan kılabdanlı şeridi işleyen Yahûd tâifesinden Karaoğlan Rafayel v. İsak ve Yasef v. Mayro ve Kotiyer v. İlya ve Yasef v. David ve Beşva v. Avram ve sâirleri meclis-i şer‘-i şerîf-i enverde tâife-i mezbûrenin berât-ı şerîf-i âlîşân ile kethüdâları olan Ali Gerçek b. Davud Gerçek muvâcehesinde her biri takrîr-i kelâm ve ta‘bîr ani’l-merâm edip biz zikr olunan tulumbacı şeridini işleyip bey‘ üzre iken tâife-i mezbûre müceddeden binâ olunan hân-ı Cedîd’e girip şerid-i mezbûru hân-ı mezbûrda işleyip hâricde kat‘â kimesne işlemeyip ve işlenen şeridlerin a‘lâsı ile kalb ve redîlerini temyîz için kethüdâ-yı mezbûra getirip a‘lâsını damgalayıp kalb ve redî olursa birkaç yerinden kat‘ oluna ve damgalanan şeridin her elli dirheminden ancak bir akçe ücret-i damga alına ve eskiden işlenip yedimizde bulunan şeridlerimiz için mühür akçesi ve sâir bahâne ile bir akçe ve bir habbe alınmamak üzre musahhah fermân-ı âlî olmağın, imtisâlen-lehû biz hân-ı Cedîd-i mezbûra nakl ve san‘atımızı onda işleyip hâricde ancak tulumbacıbaşı Davud Gerçek’den mâ‘adâ kimesne işlemeyip ve işlediğimiz şeridlerin damga için kethüdâ-yı mezbûra götürüp ba‘de’d-damga her elli dirhem şeride bir akçe ücret-i damga vermek üzre beynimizde nizâm verilip nizâm-ı mezkûr ba‘de’l-yevm beynimizde düstûrü’l-amel kılınmak üzre savb-ı şer‘den vesîka i‘tâ olunmak matlûbumuzdur dediklerinde tâife-i mezbûreyi kelimât-ı meşrûhalarında kethüdâ-yı mezbûr Ali Gerçek vicâhen ve şifâhen tasdîk ve tahkīk etmeğin, mâ vaka‘a bi’t-taleb ketb olundu. Fi’l-yevmi’s-sâmin min şehri Rebî‘ilâhir sene [1]139. [Şuhûdü’l-hâl]: el-Hâc Hayrullah b. Muslu, Mustafa Ağa b. Ahmed, Mustafa Çelebi b. Ali, el-Hâc Ahmed b. Mahmud Topçu, Teberdârzâde el-Hâc Ahmed b. Mehmed, Mehmed Ağa b. Mehmed, Eyyûb Efendi Kethüdâ, Sâlih b. Süleyman.