İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 338 Hüküm no: 256 Orijinal metin no: [76a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dumanı çevreye zarar veren kalaycı Hüseyin Beşe’nin dükkânının yerinin değiştirilmesi Ma‘rûz-ı dâ‘î-i devletleridir ki Kalaycı hırfeti erbâbından sâhib-i arzuhâl Hüseyin Beşe bundan akdem mahmiye-i İstanbul’da Dergâh-ı âlî yeniçerileri odalarından eski odalara karîb bir dükkânda sâkin olmağla odalar erbâbı dükkân-ı mezbûrun duhânı odaların nakışına zarar eder deyû mezbûru dükkân-ı merkūmdan ihrâc ve birkaç dükkân bu‘du olan bir dükkânda sâkin olup hâlâ olduğu dükkân dîk ve gene odalar duvarında olmağın karşısında vâki‘ ve hâliyetü’l-hâliye olan manav dükkânına nakl murâd etmekle, sâdır olan fermân-ı âlîlerine imtisâlen zikr olunan kalaycı hırfetinin kethüdâ ve yiğitbaşı ve sâir ihtiyârlarından husûs-ı mezbûr suâl olundukda zikr olunan manav dükkânı kalaycı dükkânı olmada zarar yokdur deyû her biri ihbâr edip ve kalaycı dükkânı sâir dükkânlara kıyâs olmadığına binâen mahallesi ahâlîsinden dahi istimzâc için kıbel-i şer‘den kâtib dâ‘îleri ta‘yîn ve mahallinde imâm ve cemâ‘atinden yirmi nefer kimesnelerden ba‘de’t-tefahhus mezbûrûndan her biri zikr olunan kalaycı dükkânının naklinde bir kimesneye kat‘â zarar olmayıp cümlemiz râzı ve şâkirleriz deyû haberlerin tahrîr, ba‘dehû meclis-i şer‘a ma‘an irsâl olunan ümenâ-i şer‘le inhâ etmeğin, mezbûr Hüseyin Beşe zikr olunan dükkâna nakline mümâna‘at olunmayıp ve kadîmî gediklerinden ziyâde kalaycı dükkânı olmamak için metâ‘ını ihrâc eylediği dükkâna bu‘d kalaycı dükkânı olmayıp hırfet-i âhar sâkin [76b] olmak bâbında fermân-ı âlî iltimâs eylediği huzûr-ı âlîlerine i‘lâm olundu. El-emru li men lehü’l-emr. Fî 24 Rebî‘ilâhir sene [1]139.