İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 393 Hüküm no: 275 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kili ve İsmail’den İstanbul’a kalitesiz sade yağ gönderilmemesi Kıdvetü’l-emâcidi ve’l-a‘yân Kili nâzırı ve İsmail mütevellîsi ( ) -zîde mecduhû- tevkī‘-i refî‘-i hümâyûn vâsıl olıcak ma‘lûm ola ki bakkal tâifesinin pazarbaşıları ve bölükbaşılarından dört nefer ma‘lûmü’l-esâmî ve tâife-i mezbûrede cemm-i gafîr ve cem‘-i kesîr müslimîn meclis-i şer‘de Kili ve İsmail câniblerinden İstanbul’a gelen ergin hâlisü’l-ayâr sâde yağın her yüz vakıyyesinde üç vakıyye tuz mu‘tâd-ı kadîm olup mikdâr-ı mezkûrdan mâ‘adâ tuz ve ayran ve sâir nesne halt ile kalb ve alçak getirilmemek üzre bundan akdem kıbel-i şer‘den i‘lâm ve mûcebince emr-i şerîfim vârid olup husûs-ı mezkûra nizâm verilmişidi birkaç seneden beri nizâm-ı mezkûra muhâlif mahlût ve kalb ve alçak yağ gelmekle nizâmları mu‘attal ve âmme-i ibâdullâha mutazarrır olmağın, fîmâ ba‘d nizâm-ı kadîm üzre tüccâr tâifesi hâlisü’l-ayâr ergin yağ getirip ber vech-i muharrer kalb ve alçak getirilmemek üzre siz ki mûmâ-ileyhsiz size hitâben emr-i şerîfim verilmek bâbında akzâ kuzâtü’l-müslimîn bi’l-fi‘l İstanbul kadısı olan Mevlânâ Mehmed Said -zîdet fezâiluhû- i‘lâm eylemeğin Mevlânâ-yı mûmâ-ileyhin i‘lâmı mûcebince amel olunup ve işbu şurût dâimâ düstûrü’l-amel mer‘î tutulup min ba‘d hilâfına ruhsat göstermemek bâbında fermân-ı âlîşânım sâdır olmuşdur. Buyurdum ki vusûl buldukda, bu bâbda vech-i meşrûh üzre şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-karîniyle âmil olunup hilâfına rızâ ve cevâz göstermeyesiz. Şöyle bilesiz, alâmet-i şerîfe i‘timâd kılasız. Tahrîren [fî] evâili şehri Recebi’l-ferd li sene semân ve selâsîn ve mi’e ve elf. Be makām-ı Kostantıniyye el-mahrûse.