İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 395 Hüküm no: 278 Orijinal metin no: [87b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumların nizamlara uygun dökülmesi Ma‘rûz-ı dâ‘î-i devlet-i aliyyeleridir ki Bal mumu dökücü esnâfından ba‘zıların dökdükleri mum kalb ve mağşûş olmağla pâk ve a‘lâ bahâsıyla nâsa bey‘ ve ızrâr etmeleriyle kethüdâları Abdülbâkī huzûrunda ba‘de’t-tefahhus satıcı esnâfının dükkânlarında ol makūle bulunan mumlar kesr olunup fîmâ ba‘d dökdükleri şem‘-i asel mukaddemâ tutulan çâşnileri gibi altmış vakıyye hâlisü’l-ayâr külçe ve kırk vakıyye şem‘ fitil mahlût olduğu hâlde dökülen pâk ve hâlis olur deyû satıcı dükkân ashâbı ittifâk ve ihbârlarından sonra yedlerinde olan çâşni merkūm kethüdâlar yedinde hıfz ve dökücü tâifesinden Hacı Hasan b. Mustafa ve İbrahim b. Ahmed ve Mustafa b. Süleyman ve Hacı Mehmed b. Cafer ve Ahmed b. Süleyman ve Süleyman b. Ahmed ba‘de’l-yevm dökdükleri mum ber vech-i muharrer hâlisü’l-ayâr ve fitilleri pâk olup ve kethüdâları yedinde olan emr-i âlîde tasrîh olunduğu üzre her bin vakıyye şem‘-i sefîdin iki yüz elli vakıyyesin kethüdâları döküp, mâ‘adâsını sâir dökücü tâifesi döküp lede’l-iktizâ ashâbı ma‘lûm olmak için dökdükleri muma kendilere mahsûs olan mühür ile mühürlenip ve kethüdâları ma‘rifetiyle dükkânlara tevzî‘ ve mühürleri tatbîk-i sicilde hıfz olunmak [88a] üzre mezbûrûna tenbîh olundukdan sonra mezbûrûn dökücü tâifesi ve ashâb-ı dekâkîn birbirlerine minvâl-i meşrûh üzre kefîl oldukları tescîl ve ba‘de’l-yevm kalb ve redî mum zuhûr ederse işleyen ve ol makūle mumu nâsa bey‘ eden dükkân sâhibi ahz ve müstahak olduğu cezâ ile te’dîb olunmak üzre hükkâm-ı kirâma ba‘de’l-ifâde san‘atlarından ihrâca her biri müte‘ahhid ve bu vechile nizâmları karâr-dâde olduğu huzûr-ı âlîlerine i‘lâm olundu. Fermân hazret-i veliyyü’l-emrindir. Fî 21 Cemâziyelâhir sene [1]144.