İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 396 Hüküm no: 279 Orijinal metin no: [88a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Küftün ve küspenin narhı Küftün Kıyye 1 Akçe 3 Küspe Kıyye 1 Akçe 2 Bundan akdem i‘lâm olunmakla mûcebince sâdır olan fermân-ı âlî üzredir. Fî 30 Cemâziyelâhir sene [1]144. Ma‘rûz-ı dâ‘î-i devlet-i aliyyeleridir ki Derûn-ı arzuhâlde mezkûr küftün ilâ hâze’l-vakt sicillâtda narh ve tes‘îri kayd olunmayıp ancak bezirci tâifesinden ashâb-ı arzuhâl muvâcehelerinde tefahhus olundukda el-yevm bezir tohumunun kilesini yüzer akçeye iştirâ edip yedi keyli bir nevbet ta‘bîr olunmakla yedi yüz akçe ve iki günde dahi harcları iki yüz yetmiş akçe olup cem‘an dokuz yüz yetmiş akçe asl-ı malları olmağla nevbet-i mezbûreden otuz beş vakıyye bezir yağı ve doksan vakıyye küftün hâsıl olur deyû takrîr ve bu takrîr üzre hâlâ bezir yağının sicilde narh ve kaydı mîrîye on sekiz ve gayre yirmi akçe olmağla otuz beş vakıyye bezir yağı yedi yüz akçe bâkī doksan vakıyye küftün üçer akçe hesâb olunsa asl-ı sermâyeleri olan dokuz yüz yetmiş akçeyi ihâta iktizâ eder üçer akçeye bey‘ olundukda mütekarrir olmadıkları ma‘lûm-ı devlet-i aliyyeleri emr ü fermân hazret-i veliyyü’l-emrindir. Fî 20 Cemâziyelâhir sene [1]144.