İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 399 Hüküm no: 283 Orijinal metin no: [88b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Celeplerden koyun fiyatlarına zam yapılması talebi Bâ sah İzzetlü yeniçeri ağası ve fazîletlü İstanbul kadısı Efendi bu husûs âmme-i ibâdullâha râci‘ olacak keyfiyyâtdan olmağla gereği gibi çâşni tutulup hakk u adl üzre sıhhatini i‘lâm eyleyesin deyû buyruldu. Devletlü inâyetlü merhametlü sultânım hazretleri sağ olsun. Bu kulları koyun getiren kışlakçı celeb kullarından olup işbu sene-i mübârekede mübâyaa eylediğimiz erkek koyunlar yüz altmış ve yüz yetmiş akçeye ve marye kısır koyunlarımız dahi yüz yirmi ve yüz otuz akçeye mübâyaa olunup mahallinde yazlak masrûfumuz yetmiş akçeye ve kışlak harcımız dahi kırkar akçeye bâliğ olmağla erkek koyunlarımız ikişer yüz yirmi beş akçe ve marye koyunlarımızı yüz seksen ve yüz doksan akçeyi tecâvüz etmekle hâlâ erkek koyunumuz ancak on iki ve on üç vakıyye gelip ve marye koyunlarımız on vakıyyeden ziyâde gelmeyip bu vech üzre mallarımızdan çâşni tutup vücûh ile merhamet ve âtıfete şâyeste ve sezâvâr kulları olduğumuzdan bu sene-i mübârekede narh verilmek recâsıyla hâkpâ-yı devletlerine yüz süregelmişizdir hâlâ sene-i meymenede yedi akçeye dakīk ve altmış akçeye şa‘îr ve kırk akçeye on vakıyye [89a] kepek alıp koyunlarımız besleriz bu âna gelince lillâhi’l-hamd ve’l-minne def‘-i müzâyaka olunup ibâdullâha hizmet olundu. İnşâallâhu te‘âlâ bundan böyle de ibâdullâha hizmet etmek isteriz buhusûsda müsâ‘ade olunmadığı hâlde bâ‘is-i müzâyaka olacağı ma‘lûm-ı devletleri oldukda, bu bâbda merhamet [ve] şefkat devletlü efendimizindir. Bende-i celeb-i kışlakçıyân.