İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 398 Hüküm no: 282 Orijinal metin no: [88b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zeytinyağı narhı Sah İ‘lâmı mûcebince ancak bu seneye mahsûb olan revgan-ı zeyt olmak üzre müsâ‘ade olunmak buyruldu. Musahhahdır. İstanbul kadısı fazîletlü Efendi ahvâllerin görüp iktizâsını i‘lâm edesin deyû buyruldu. Ma‘rûz-ı dâ‘î-i devlet-i aliyyeleridir ki Ashâb-ı arzuhâl Edremid tüccârından mesfûrü’l-esâmî kimesneler derûn-ı arzuhâlde mufassalan zikr olunduğu üzre bu sene-i mübârekede zeyt kalîl olduğuna binâen mahallerinden ziyâde bahâ ile şirâ olunmakla, el-yevm narh-ı cârîsi olan yirmi ve yirmi iki akçeye bey‘ eylediğimiz hâlde ziyâde mutazarrır oluruz deyû meclis-i şer‘de müsâ‘ade olunmak üzre kirâren ve mirâren ahvâllerin ifâde ve vukūfu olanların ba‘de’t-tefahhus bir mikdâr müsâ‘adeye muhtâc oldukları nümâyân olmağın, her vakıyyesi yirmi dört akçeye irzâ olundukları ma‘lûm-i devlet-i âsafâneleri oldukda emr ü fermân men lehü’l-emrindir. Fî 28 Cemâziyelâhir sene [1]144. Devletlü merhametlü sultânım hazretleri sağ olsun Bu kulları Edremid tüccârlarından olup revgan-ı zeyt yerinde yirmi iki akçeye alırız, bu tarafa navlun ve gümrüğü ile dört akçe harcı ile yirmi altı akçeye olduğunda bâzirgân bizden ve bakkal esnâfı ve pazarbaşı sattırmağa mâni‘ oldu, rızkımız ibtâl ve küllî gadr murâd ederler merâhim-i aliyyelerinden mercûdur ki, bu fukarâya merhamet olunsun, ne minvâl üzre fermân olur ise emr ü fermân sultânımındır. Bende-i tüccâr tâifeleri.