İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 427 Hüküm no: 289 Orijinal metin no: [95b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumcuların taşradan getirdikleri mum yağına müdahale edilmemesi Akzâ kuzâtü’l-müslimîn evlâ vülâtü’l-muvahhidîn ma‘denü’l-fazli ve’l-yakīn râfi‘-i a‘lâmü’ş-şerî‘ati ve’d-dîn vâris-i ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în İstanbul ve Galata kadıları -zîdet fezâiluhümâ- tevkī‘-i refî‘-i hümâyûn vâsıl olıcak ma‘lûm ola ki, Galata ve Tophâne ve Kasımpaşa ve Beşiktaş’da olan mumcu tâifesi südde-i sa‘âdetime arzuhâl edip şem‘-i revgan kıllet üzre oldukda her birileri kârhânelerinde ibâdullâha kifâyet mikdârı mum tedârükinde usret ve ibâdullâha mum vermede küllî zahmet çekmeleriyle her birileri Bahr-i siyah sevâhilinde ve sâir etrâf ve eknâfdan buldukları mahallerden kendi akçeleriyle iştirâ eyledikleri mum yağını kârhânelerine getirip, işleyip ibâdullâha bey‘ murâd eylediklerinde sâir kârhâne sâhibleri tedârük eylediğiniz yağdan biz dahi hisse isteriz deyû ta‘cîz ve rencîdeden hâli olmadıkların bildirip, ol makūle taşradan akçeleri ile iştirâ ve tedârük edip getirdikleri revgandan sâir kârhâne sâhibleri hisse alırız deyû müdâhale ve te‘addî ettiril[me]mek bâbında hükm-i hümâyûnum recâ eyledikleri ecilden, vech-i meşrûh üzre bundan böyle kendileri taşradan getirdikleri yağları tevzî‘ teklîfi ile rencîde ve te‘addî olunmamak emrim olmuşdur buyurdum ki ( ) vusûl buldukda, bu bâbda sâdır olan emrim üzre amel dahi mezbûrlar bundan böyle taşradan tedârük ve iştirâ ve getirdikleri yağları tevzî‘ teklîfi ile rencîde ve remîde ve te‘addî ettirmeyip mûceb-i emr-i şerîfimle âmil olasız. Şöyle bilesiz, alâmet-i şerîfe i‘timâd kılasız. Tahrîren fî evâili Zilka‘de sene sitte ve erba‘în ve mi’e ve elf. Be makām-ı Kostantıniyye el-mahmiyye.