İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 514 Hüküm no: 298 Orijinal metin no: [115a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap, celep ve çiftçilerin şikâyeti üzerine Koyun Emaneti’nin kaldırıldığı İ‘lâmı mûcebince amel olunup fîmâ ba‘d ba‘dehû emânet-i mezbûre ref‘ oluna deyû buyruldu. Kasab i‘lâmı Ma‘rûz-ı dâ‘î-i devletleridir ki Kasablar kethüdâsı Mehmed Ağa’nın ve çeyrekçiler kethüdâsı el-Hâc Ali ve Hasköylü Hacı Ali ve Yedikule kasablarından el-Hâc Mehmed ve Mahmud ve Ebûbekir ve diğer el-Hâc Ali ve Sâlih ve Molla Ahmed ve Ali nâm kimesneler meclis-i şer‘de izzetlü sekbânbaşı ağa kulları hâzır oldukları hâlde koyun emâneti kasab ve çeyrekçi ve cellâb ve rençber fukarâlarına vücûhla zararı olup her bâr mutazarrır olduğumuza binâen ref‘ oluna ve arzuhâlde yedlerimizde mevcûd ve taşralarda mâlik olduklarımız koyunları narh-ı rûzîsi üzre lahm-ı ganemin bir vakıyyesin on beşer akçeye ve lahm-ı kuzunun her vakıyyesin yirmişer akçeye ibâdullâha bey‘ edip kanâdârlarımızı dahi meclis-i şer‘a getirip ber vech-i muharrer tarhından ziyâdeye bey‘ etmemeleri için mütenebbih ettirdiğimizden sonra biz kanâdârlarımıza luhûmu noksan vezn edip ve narhından ziyâde bahâ ta‘yîn edip irsâl eylediğimiz mu‘ayyen olursa bizlere ve onlara dahi narhından ziyâdeye bey‘ etmekle ahz olunurlar ise onlara lâyıklar olduğumuz cezâ ile tertîb-i cezâ olunmağa râzılarız. Ba‘de’l-yevm dahi cellâb [ve] rençberin getirdikleri koyunları ma‘rifet-i şer‘ ve ağa-yı mûmâ-ileyh nezâreti ile çâşni tutulup iştirâ eylediğimizden sonra narh-ı rûzîsinden ziyâdeye bey‘ etmemeğe şürût-ı mezkûre ile müte‘ahhidiz dedikleri ba‘de’t-tescîl emânet-i mezbûrenin ref‘i bâbında fermân-ı âlîleri recâsında oldukları huzûr-ı âlîlerine i‘lâm olundu. Bâkī emr ü fermân hazret-i men lehü’l-emrindir. Fî 7 Safer sene 1151.