İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 519 Hüküm no: 307 Orijinal metin no: [116b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yangınların yayılmasına sebep olan taraçaların kaldırılması Sûret-i fermân-ı âlî Tahta-pûş fermânı Kıdvetü’l-emâcid ve’l-a‘yân hâssa mi‘mârbaşı olan ( ) -zîde mecduhû- tevkī‘-i refî‘-i hümâyûn vâsıl olıcak ma‘lûm ola ki, ba‘zı kimesnenin menzillerinin sakfların üzerlerini âdet-i kadîmeye mugāyir mürtefi‘ tahta-pûşlar ihdâsına mübtelâ olup ol makūle tahta-pûşun harîklerde civârında olan menâzile sirâyeti sebebi ile zarar-ı azîmi olduğunu binâen memnû‘âtdan olduğundan mâ‘adâ etrâfında olan tahta-pûşlara zamân-ı kalîlde fenâ bulmakla civârında olanlar ile birbirlerinin nisvânına nezâretleri menhî ve münker olup ve birbirlerinde nizâ‘ ve husûmete müeddî olduğu zâhir ve müte‘ayyin ve müte‘addiden vâki‘ olmağla fîmâ ba‘d bu misillü sakflar üzerinde tahta-pûş ihdâs olunmamak emr-i savâb olduğu cihetiyle alâ vechi’t-te’kîd sen ki mûmâ-ileyhsin sana hitâben müceddeden emr-i şerîfim verilmek için akzâ kuzâtü’l-müslimîn İstanbul kadısı Mevlânâ Mehmed Said -zîdet fezâiluhû- i‘lâm etmeğin, i‘lâm mûcebince fîmâ ba‘d sakf üzerinde tahta-pûş ihdâs olunmayıp hilâfına hareket edenler alâ eyyi hâlin men‘ ü def‘ olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vusûl buldukda, bu bâbda vech-i meşrûh üzre şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlinin mazmûn-ı itâ‘at-makrûnuyla âmil olup hilâfından be gāyet ihtirâz ve ictinâb üzre olasın. Şöyle bilesin, alâmet-i şerîfime i‘timâd kılasın. Tahrîren fî evâhiri min şehri Zilhicce sene 1138. [Arka kapak içi] ( )