|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 111 Hüküm no: 110 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Osman Ağa’nın el-Hâc Mehmed Ağa’ya borcu olduğu
Gıbbe’t-taleb ve’l-iltimâs cânib-i şer‘-i kaviyyü’l-intisâbımdan irsâl olunan mevlânâ Abdulkādir Efendi mahmiye-i İstanbul’da Balkapanı hanında işbu râfi‘u’l-kitâb el-Hâc Mehmed Ağa b. Abdülmennan’ın sâkin olduğu hücreye varıp zeyl-i kitâbda mastûrü’l-esâmî olan Müslimîn huzûrlarında akd-i meclis-i şer‘-i mutahhar eyledikde mahmiye-i mezbûrede Yenibağçe Arpa[emîni] Mahallesi’nde sâkin fahrü’l-imtisâl Osman Ağa b. Gazanfer meclis-i mezbûrda merkūm el-Hâc Mehmed Ağa mahzarında ikrâr-ı tâm ve takrîr-i kelâm edip merkūm el-Hâc Mehmed Ağa’dan hâlâ iktirâz ve tesellüm eylediğim on bin beş yüz altmış kıt‘a riyâlî guruş kesr mezbûr el-Hâc Mehmed Ağa’ya zimmetinde lâzımü’l-edâ ve vâcibü’l-kazâ deynimdir dedikde mukırr-ı mezbûr Osman Ağa’yı ikrâr-ı meşrûhunda el-mukarru lehü’l-merkūm el-Hâc Mehmed Ağa vicâhen tasdîk ve şifâhen tahkīk ettikden sonra dâyin-i merkūm el-Hâc Mehmed Ağa meclisi- mezbûrda meblağ-ı merkūm on [bin] beş yüz altmış kıt‘a riyâlî guruş kesrin edâsı’çün târîh-i kitâbdan bir sene tamamına değin medyûn-ı mezbûr Osman Ağa’yı imhâl etmeğin vâki‘ hâlî mevlânâ-yı mezbûr mahallinde tahrîr ba‘dehû cânib-i şer‘den ma‘an irsâl olunan Çukadâr Mehmed Beşe b. Süleyman ve hüddâmdan Mehmed Çelebi b. Hüseyin ve Ali Bey b. Mehmed ile gelip meclis-i şer‘de vukū‘u üzere herbiri inhâ ve takrîr etmeğin mâ-vaka‘a gıbbe’t-taleb ketb [ü] sebt olundu.
Fi’l-yevmi’s-sâdis ve’l-ışrîn min-Şevvâli’l-mükerrem li-sene selâse ve sittin ve elf.
Şuhûdü’l-hâl: Emîrü’l-ümerâi’l-kirâm Mustafa Paşa vâlî-yi Habeş hâlâ, es-Seyyid Osman Çelebi b. es-Seyyid Hasan, el-Hâc Osman b. Abdullah Pazarbaşı sâbıkā , İbrahim Bey b. Hasan el-Yesârî ve gayruhum mine’l-huzzâr.
|