|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 111 Hüküm no: 111 Orijinal metin no: [17a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Dimitri v. Lambernos’un bağını Yusuf b. el-Hâc Mustafa’ya sattığı
Mahrûse-i Üsküdar -sînet ani’l-ekdâr- kazâsı muzâfâtından Kartal nâm karye ahâlîsinden Dimitri v. Lambernos nâm zimmî mahfil-i kazâda işbu râfi‘u’l-kitâb Yusuf b. el-Hâc Mustafa mahzarında ikrâr-ı tâm ve takrîr-i kelâm edip karye-i mezbûre sınırında vâki‘ bir tarafı karındaşım Lori bağı ve bir tarafı tarîk [ve bir tarafı] Yani bağı ve bir tarafı Danil bağı ve bir tarafdan Oron oğlu bağı ile mahdûd bir kıt‘a mülk bağımı mezbûr Yusuf’a beş bin beş yüz nakd râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra semeni olan meblağ-ı mezbûr beş bin beş yüz akçeyi bi’t-tamam ve’l-kemâl yedinden ahz u kabz eyledim, ba‘de’l-yevm zikr olunan bağda benim alâka ve medhalim kalmayıp mezbûr Yusuf’un mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dedikde gıbbe’t-tasdîk mâ-vaka‘a ketb ü sebt olundu.
Fi’l-yevmi’s-sâbi‘ min-Zilka‘deti’ş-şerîfe li-sene selâse ve sittin ve elf.
Şuhûdü’l-hâl: el-Hâc Himmet b. Mehmed, Arslan Beşe b. İsmail, el-Hâc Hasan b. Mehmed, Mahmud Beşe b. Ömer, Mehmed b. ( ).
|