İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 73 Hüküm no: 9 Orijinal metin no: [3-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elvanzade Vakfı’nın Arab Camii yakınındaki fırın ve değirmeninin mutasarrıfı olan Bogos’un kira artırımı talebinin kabul edilmemesi Galata Arab Câmi‘i kurbünde vâki‘ değirmenin icâresini teksîre adem-i ruhsat Ma‘rûz, İstanbul kādıları efendiler dâ‘îleri nezâretinde olan evkāfdan Elvanzâde Vakfı musakkafâtından Galata’da Arab Câmi‘-i şerîfi kurbünde Sipâhî Pazarı sûkunda vâki‘ ma‘lûmü’l-hudûd fırının ve ittisâlinde vâki‘ değirmenin mutasarrıfı Bogos İstanbul’da meclis-i şer‘-i şerîfde fırın-ı mezkûrda müstecirleri olan İbrahim Ağa ve el-Hâc Osman ile Melkon ve Bedros’dan mezbûrân İbrahim Ağa ve el-Hâc Osman mahzarlarında zikr olunan fırını bundan akdem ta‘mîr esnâsında destgâh ve hatab vaz‘ olunacak mahâlli zîk olmağla civârında olan bir mikdâr arsayı sâhibinden beher şehr yüzer para icâre ile isticâr ve hîn-i ta‘mîrde fırın-ı mezkûra ilhâk ve tevsî‘ ve ba‘dehû zikr olunan fırın ve değirmeni icâre-i kadîmesi olan beher şehr otuz bir guruş onar paraya işbu yedimde olan i‘lâm mantûkunca mezbûrûna icâr ve teslîm, onlar dahi kabûl etmiş idi. Hâlâ ilhâk olunan arsa-i mezkûrenin icâresi yüzer para dahi icâre-i mezkûre-i kadîmeye zam olunsun deyü ba‘de’l-icâr eylediği da‘vâsı mesmû‘a olmadığından mâ‘adâ mezbûrânın yedlerinde olan arzuhâl hâmişinde mastûr Başmuhâsebe’den muhrec şurût-ı nizâmlarında fırın ve değirmen sâhibleri kirâ artırmak bahânesiyle müstecirleri rencîde etmeyeler deyü musarrah olmağın müdde‘î-i merkūm Bogos ziyâde icâre-i mezkûre için mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fermân hazret-i veliyyü’l-emrindir. Fî 14 min-Recebi’l-ferd sene 1179.