İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 72 Hüküm no: 8 Orijinal metin no: [3-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasaplar Kethüdası Mehmed aleyhindeki koyun, kuzu ve deri dağıtımıyla ilgili davadan vazgeçildiği Koyun ve kuzu ve deri tevzî‘ olundukda kasabbaşı ağa ve sâir ustalar ma‘rifetiyle tevzî‘ oluna. Ma‘rûz, Ashâb-ı arzuhâlden İslambol’da Vâlide Sultân Câmi‘-i şerîfi havlusu çâryekcilerinden Keleş el-Hâc Mustafa ve el-Hâc Hasan ve el-Hâc Ali ve el-Hâc Mehmed ve Kādı karyeli el-Hâc Mehmed ve es-Seyyid Mehmed ve Kasımpaşalı Mustafa ve Küçük Halil ve Ömer Beşe ve Sultân Bâyezid Câmi‘-i şerîfinde el-Hâc Hasan ve Molla Ahmed ve Eğrikapı Kethüdâsı Mustafa ve es-Seyyid Mustafa meclis-i şer‘-i hatîrde derûn-ı arzuhâlde mezkûr Kasablar Kethüdâsı vekîli Mehmed mahzarında kasab ustalarından el-Hâc Mehmed ve Molla Osman ve es-Seyyid İbrahim ve Molla Ali ve es-Seyyid Halil ve es-Seyyid Ömer ve sâirleri hâzır oldukları hâlde öteden beri nizâm-ı tevzî‘imiz kasabbaşı ağa ve ihtiyâr ustalar huzûrunda ma‘rifetleriyle mevcûd olan ağnâmdan zebûn ve semîn hisselerimiz beynimizde mu‘teber kur‘a ile ta‘dîl ve tesviye vechi üzere beher bin re’s ağnâmda yüz altmış re’si Vâlide Sultân câmi‘-i şerîfi çeyrekçilerine ve iki yüz re’si Eğrikapı çeyrekçilerine ve bâkīsi Yedikule kasablarına bilâ-gadr tevzî‘ olunagelmiş iken mezbûr Kethüdâ Mehmed bize gadr irâdesiyle nizâm-ı mezkûra mugāyir kasabbaşı ağa ve ustalar ma‘rifetlerinsiz bî-hengâm tevzî‘ler edip ve hissemizden ezyed ekle sâlih olmayan lâgar ve zebûn ağnâmı hissemize tarh ve semîn olanlarını kasablara tevzî‘ ile bize gadr ü müdâhaleden hâlî olmamağla mezbûrdan teşekkî eylemiş idik. Hâlâ mezbûr kethüdâ Mehmed bize gadr irâdesinde olmayıp ve kasabbaşı ağa ve cümle ustalar hâzır olmadıkça hissemize ziyâde koyun tarh etmeyip zikr olunduğu üzere ta‘dîl ve tesviye vechi ile cümlemiz ma‘rifetleriyle tevzî‘ olunmak ve gerek koyun ve gerek kuzu, gerek deri pazar olunduğu vakitlerde dahi cümlemiz ma‘rifetleriyle pazar olunup ve bu nizâmın hilâfı zuhûr eder ise lâzım gelen te‘dîbi izzetlü yeniçeri ağası ma‘rifetiyle icrâ olunmak üzere müte‘ahhid olmağla biz dahi bu minvâl üzere râzılar olup da‘vâ-i meşrûhamızdan fâriğ ve kat‘-ı nizâ‘ eylediğimiz ecilden mezbûrun ta‘ahhüdü tescîl olunup i‘lâm olunmak matlûbumuzdur deyü mezbûrûnun takrîrlerini mezbûr Mehmed Kethüdâ tasdîk etmeğin ba‘de’t-tescîl iltimâslarıyla huzûr-ı âlîlerine i‘lâm olundu. Fermân hazret-i veliyyü’l-emrindir. Fî 15 min-Recebi’l-ferd sene 1179.