İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 74 Hüküm no: 11 Orijinal metin no: [4-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın Bekir Ağa aleyhindeki hizmetkârlık ücreti davasında anlaşma sağlanması Ücret Ma‘rûz, Sâhib-i arzuhâl hizmetkâr Mustafa meclis-i şer‘-i şerîfe ihzâr eylediği derûn-ı arzuhâlde mezkûrü’l-ism zü‘amâdan Bekir Ağa mahzarında mezbûr Bekir Ağa’ya beher şehr beşer guruş ücret kavliyle yetmiş yedi senesi Cumâdelâhiresi gurresinden yedi ay hizmet etmekle yedi ayda müstahık olduğum otuz beş guruş ile yıllık için dahi elli guruş taleb ederim deyü eylediği da‘vâsından bâ-vesâtet-i Müslimîn on bir guruş bedel-i makbûza mezbûr Bekir Ağa ile sulh olup ücret-i mezkûresine müte‘allıka da‘vâdan mezbûr Bekir Ağa’nın zimmetini ibrâ-i âm ile ibrâ etdikde ol dahi ibrâsını kabûl ve kat‘-ı nizâ‘ eylediği tescîl ve mübâşiri çavuş kulları iltimâsıyla huzûr-ı âlîlerine i‘lâm olundu. Bâkī fermân hazret-i men-lehü’l-emrindir. Fî 17 B sene [1]179.