İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 74 Hüküm no: 12 Orijinal metin no: [4-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruscuklu Mehmed’in Hezargrad kadısı Dede Mehmed Efendi’nin kethüdası Süleyman aleyhindeki rüşvet davasında anlaşma sağlanması Hezargrad kazâsı efendinin kethüdâsından Tuzca Mukāta‘ası Emîni taleb-i rüşvet. Ma‘rûz, Balkapanı’nda sâkin Ruscuklu sâhib-i arzuhâl es-Seyyid Mehmed b. Hüseyin Çarşamba günü huzûr-ı âlîlerinde ma‘kūd meclis-i şer‘-i enverde Hezargrad kādısı olup bundan akdem fevt olan Dede Mehmed Efendi’nin zamân-ı kazâsında kethüdâsı olan derûn-ı arzuhâlde mezkûrü’l-ism Süleyman b. Abdullah mahzarında on üç ay mukaddem ben Hezargrad havâlîsinde Tuzca Mukāta‘ası mültezimi olmağla işbu mezbûr Süleyman benim için seni mukāta‘a ahâlîsi istemez da‘vâcındır diyerek zabtım için Hezargrad Mahkemesi’nde rüşvet tarîkiyle malımdan yedi yüz elli guruşumu ahz ve istihlâk etmekle hâlâ taleb ederim deyü da‘vâ ol dahi cevâbında müdde‘î-i mezbûr meblağ-ı mezkûrun beş yüz guruşunu müteveffâ-yı mezbûr Mehmed Efendi için ve otuz guruşunu harc-ı hüddâm için vermekle emriyle mahâllerine teslîm ve benim için ancak elli guruş vermiş idi deyü müdde‘î-i mezbûrun ber-vech-i muharrer emrini isbât esnâsında müdde‘î-i mezbûr bâ-vesâtet-i Müslimîn da‘vâ-i meşrûhasından iki yüz elli guruş bedel-i makbûz mukābelesinde mezbûr Süleyman ile sulh olup iddi‘â eylediği yedi yüz elli guruşa müte‘allıka âmme-i da‘vâ ve kâffe-i mutâlebâtdan gerek mezbûr Süleyman’ın ve gerek müteveffâ-yı mezbûr Mehmed Efendi’nin oğlu hâzır bi’l-meclis Molla Mehmed Sadık’ın ve gerek sâir veresesinin zimmetlerini ibrâ-i âm ile ibrâ ve iskāt eyledikde mezbûrân dahi ibrâsını kabûl ve kat‘-ı münâza‘a eyledikleri tescîl olunup mübâşirleri çavuş kulları iltimâsıyla huzûr-ı âlîlerine i‘lâm olundu. Fermân hazret-i veliyyü’l-emrindir. Fî 17 min-Recebi’l-ferd sene [1]179.