İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 82 Hüküm no: 23 Orijinal metin no: [9-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lütfullah tarafından kiralanmış olan attar dükkânları ile Süleyman’ın kiraladığı kahveci dükkânlarında pişmiş kahve satılmaması Keşf der-kurb-ı Kumkapı dâhili Ma‘rûz, Mahmiye-i İstanbul’da Kumkapı dâhilinde Dülbendçi Hüsameddin mahâllesinde vâki‘ Hüseyin Beşe nâm kimesnenin menzili tahtında olup Lütfullah nâm kimesnenin icâresinde olan dört kepenk attâr dükkânı ve karşısında Mehmed nâm kimesnenin menzili tahtında olup yine mezbûr Lütfullah icâresinde olan iki kepenk attâr dükkânı ve yine mahâll-i mezkûre karîb bakkāl dükkânı karşısında vâki‘ Süleyman nâm kimesnenin menzili tahtında olup Ali nâm kimesnenin icâresinde olan kahveci dükkânının târîh-i ihdâsları suâli bâbında sâdır olan fermân-ı âlîlerine imtisalen keşif nâibimiz müderrisîn-i kirâmdan es-Seyyid Halil Efendi ve mi‘mâr ağa tarafından İsmail ve Ebubekir ve sâir Müslimîn ile zikr olunan mahâlle varıp ahâlîsinden istifsâr ve istihbâr olundukda altmış altı senesinde vâki‘ harîk akabinde ihdâs olunup lâkin zikr olunan üç aded dükkânlarda kahve tabh olunması sebebiyle ba‘zı mechûlü’l-ahvâl kimesneler derûnunda oturmağla emniyetimiz meslûb olduğu ecilden fîmâ-ba‘d <> dekâkîn-i mezkûrede pişmiş kahve bey‘ olunması sebebiyle ol misillü kimesneler oturması men‘ buyrulmak bâbında fermân-ı âlîleri sudûrunu ahâlî-i mezbûreden arzuhâl edenlerden otuz nefer mazbutü’l-esâmi Müslimîn istid‘â eyledikleri mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 20 B sene [11]79.