İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 83 Hüküm no: 25 Orijinal metin no: [9-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hocapaşa mahallesi civarında bulunan Vezir Mescidi’nin müstakil bir mahallesi olmadığından etrafında oturan ahalinin işleri için Hocapaşa Camii veya Vezir Mescidi imamını seçmekte serbest oldukları Hocapaşa mahâllesi kurbünde mahâlle-i âhar kaydı yoğiken muhdes mahâlle iddi‘â ederler. Ma‘rûz, Mahmiye-i İstanbul’da Hocapaşa mahâllesi imamı sâhib-i arzuhâl Hasan Efendi meclis-i şer‘-i enverde merhûm Kara Mustafa Paşa’nın mahâlle-i mezbûrede binâ eyleyip Vezîr Mescidi demekle ma‘rûf mescid-i şerîfin hâlâ imamı olan derûn-ı arzuhâlde mezkûrü’l-ism Hâfız es-Seyyid Halil Efendi’den imam olduğum Hocapaşa mahâllesi ahâlîleri beynlerinde vâki‘ olan akd-i enkiha ve gasl-i mevtâ ve sâir eimmeye dâir umûr ve husûslarını eslâfım ve ben rü’yet edegelip hattâ Mevkūfât Defteri’nden muhrec işbu derkenâr olunan fermân-ı âlîşânda gerek Hocapaşa mahâllesi ve gerek ittisâlinde olan Hobyar ve Elvan ve Karaköy mahâllelerinin tasrîhiyle avârız kaydları başka başka zikr ü beyan olunup mahâlle-i âhar kaydı yoğiken merhûm-ı müşârün-ileyhin mescid-i şerîfinde imam olan işbu mezbûr Halil mescid-i mezkûr vakfı musakkafâtından elli altı bâb menzile Ali Kıcır ismiyle tesmiye ve Hocapaşa mahâllesinden müfrez ve mümtâz âhar mahâlle olmağla menâzil-i mezkûr mutasarrıflarının eimmeye dâir umûr [10] ve husûslarını ba‘zan ben rü’yet ederken bu esnâda ancak ben rü’yet ederim deyü hilâf-ı nizâm-ı kadîm benim umûr ve husûsuma müdâhale eder deyü derkenâr-ı mezkûr üzere tuğrâ-yı garrâ ile mu‘anven bir kıt‘a fermân-ı âlîşân ibrâzıyla teşekkî eyledikde fermân-ı âlîşâna nazar olunup fi’l-hakīka Hocapaşa mahâllesi ve ittisâlinde olan Hobyar ve Elvan ve Karaköy mahâlleleri tasrîh ve avârızları kaydı mübeyyen ve mahâllât-ı erba‘adan gayrı ol mahâlde mahâlle kaydı bulunmadığı ve mescid-i mezbûrun imamı mezbûr Halil Efendi yedinde olup müdde‘î-i imam-ı mezbûr ile murâfa‘a-i sâbıkālarını nâtık ibrâz eylediği iki kıt‘a i‘lâmda dahi sâlifü’z-zikr Kara Mustafa Paşa mescidine mahâlle tahsîsi mezkûr olmayıp ancak menâzil-i mevkūfe-i mezkûre mutasarrıfları umûr ve husûslarını rü’yete mescid-i mezkûr imam-ı mezbûru ihtiyâr ve Hocapaşa imamı mutasarrıfûn-ı mezbûrûnun rızâları olmadıkça umûrlarına dahl ü ta‘arruz etmeyeler deyü mastûr olduğundan mâ‘adâ hakīkat-i hâl minvâl-i muharrer üzere olduğunu zikr olunan Hocapaşa mahâllesi ve civârında vâki‘ mahâllâtda vukūfu olan sikāt-ı Müslimînden kırk üç nefer mazbûtü’l-esâmi Müslimîn ale’ş-şöhreti’t-tevâtür meclis-i şer‘-i şerîfe gelip haber vermeleriyle zikr olunan i‘lâmlar mûceblerince menâzil-i mezkûre mutasarrıflarının umûr-ı mezkûrelerini Hocapaşa imamı için rü’yet şer‘an rızâlarına mevkūf olup ve mescid-i mezkûrun fermân-ı âlîşânda mahâllesi kaydı olmamağla ber-mûceb-i fermân-ı âlîşân menâzil-i merkūmu başka mahâlle irâdesiyle tahdîd ve tahsîs emrinde mescid-i mezkûr imamı mezbûr Halil Efendi mu‘ârazadan men‘ olunup Hocapaşa imamına dahi menâzil-i mezkûre mutasarrıflarından rızâlarıyla mescid-i merkūm imamını ihtiyâr edenlere mücerred Hocapaşa mahâllesidir deyü müdâhale etmemek üzere ba‘de’t-tenbîh menâzil-i mevkūfe-i mezkûre mutasarrıflarının ba‘zıları merkūm Mustafa Paşa Mescidi imamını ihtiyâr etmeleri sâirlerine sirâyet etmemekle rızâları olmadıkça sâirlerine dahi mücerred müstecir-i vakf-ı mezkûrsız deyü müdâhale etmemek üzere mezbûr Halil Efendi’ye tenbîh olunduğu bi’l-iltimâs huzûr-ı âlîlerine i‘lâm olundu. El-emrü li-men-lehü’l-emr. Fî 22 B sene 1179.