İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 86 Hüküm no: 28 Orijinal metin no: [11-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samatya’da Hacce Kadın Vakfı’na ait menzil ve içindeki eşyalara ait davada tarafların zimmetlerini ibra etmesi Merhaba Köşesi’nde vâki‘ menzil ibrâsını isbât Kasaba-i Kasımpaşa’da mütemekkine ve şahs-ı ta‘rîf-i şer‘le mu‘arrefe Sara bt. Avanis v. Hıristo nâm Nasrâniye mahmiye-i İstanbul’da meclis-i şer‘-i hatîrde on ay mukaddem hâlik olan Kazer v. Kosta v. Haçok nâm zimmînin sulbî kebîr oğulları olup mahmiye-i mezbûrede Samatya’da Mîrahor mahâllesinde Merhaba Köşesi nâm mahâlde vâki‘ bir tarafdan Kasab Nikola menzili ve etrâf-ı selâsesi tarîk-i âm ile mahdûd İstanbul kādıları efendiler nezâretlerinde olan evkāfdan Hacce Kadın Vakfı’ndan bir bâb menzile bâ-re’y-i mütevellî kat‘â ferâğ ile vaz‘-ı yedleri mütehakkık olan işbu bâ‘iseyi’s-sifr Yorgi ve Atan nâm zimmîler muvâcehelerinde vakf-ı mezkûr mütevellîsi tarafından vekîli hâzır olduğu hâlde üzerine da‘vâ ve takrîr-i kelâm edip menzil-i mezkûr taraf-ı vakf-ı mezbûrdan yevmî ikişer akçe icâre ile tasarrufumda olmağla hâlik-i merkūm Kazer’e cihet-i şer‘iyyeden iki bin beşyüz guruş deynimin mukābelesinde yetmiş iki senesinde ferâğ bi’l-vefâ tarîkiyle bâ-re’y-i mütevellî ferâğ ve teslîm ve kable edâi’d-deyn merkūm Kazer hâlik oldukda menzil-i merkūm oğulları işbu merkūmân Yorgi ve Atan’a intikāl etmiş idi. Hâlâ ben mezbûrâna edâ-yı deyn ve menzil-i merkūmu yine re’y-i mütevellî ile istirdâd murâd ederim, suâl olunmak matlûbumdur dedikde gıbbe’s-suâl merkūmân Yorgi ve Atan cevâblarında müdde‘iye-i mezbûre Sara menzil-i mezkûru babamız hâlik-i merkūma kabz eylediği meblağ-ı merkūm iki bin beş yüz guruş bedel mukābelesinde bâ-re’y-i mütevellî kat‘â fâriğ ve fâriğān ani’ş-şevâgil ba‘de’t-teslîm babamız merkūmun helâkinden bize intikāl edip hattâ işbu müdde‘iye-i mezbûre Sara menzil-i mezkûre vech-i meşrûh üzere bizden da‘vâ ve işbu yetmiş dokuz senesi şehr-i Rebî‘ülevveli’nin on dördüncü günü mahfil-i şer‘iyyâtda üç yüz guruş bedel-i makbûz mukābelesinde bizim ile sulh olup menzil-i mezkûra ve içinde müstehleke yine bizden iddi‘â eylediği beş yüz guruş kıymetli eşyâya müte‘allıka âmme-i da‘vâdan bizim zimmetimizi ba‘de’l-ibrâ ve’l-kabûl menzil-i mezkûrda kat‘â alâkası olmadığını huzûr-ı Müslimînde ikrâr ve işhâd dahi etmiş idi deyü târîh-i merkūm ile müverraha ve ol vakitde şer‘iyyâtî Veliyüddin Efendi imzâsıyla mümzât ve hatemiyle mahtûme takrîrlerine mutâbık bir kıt‘a hüccet ibrâzıyla ba‘de’d-def‘ ve’l-inkâr merkūmândan def‘-i meşrûhlarına beyyine taleb olundukda isimleri zeyl-i hüccet-i mezkûrede mastûr udûl-i ahrâr-ı ricâl-i Müslimînden Ayvansaray’da Mustafa Paşa mahâllesinde sâkin <> Ömer Efendi b. Abdurrahman ve Samatya’da Suffe nâm mahâlde sâkin Mehmed b. Veliyüddin nâm kimesneler li-ecli’ş-şehâde meclis-i şer‘-i şerîfe hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz işbu Sara Nasrâniye işbu bin yüz yetmiş dokuz senesi Rebî‘ülevveli’nin on dördüncü günü mahfil-i şer‘iyyâtda merkūmân [12] Yorgi ve Atan ile üç yüz guruş bedel-i makbûz mukābelesinde sulh olup Samatya’da Mîrahor mahâllesinde Merhaba Köşesi’nde vâki‘ bir tarafdan Kasab Nikola ve etrâf-ı selâsesi tarîk-i âm ile mahdûd Hacce Kadın Vakfı’ndan olan bir bâb menzil-i mezkûr ve içinde müstehleke beş yüz guruş kıymetli eşyâya müte‘allıka âmme-i da‘vâdan işbu merkūmân Yorgi ve Atan’ın zimmetlerini ibrâ edip onlar dahi ibrâsını ba‘de’l-kabûl menzil-i mezkûrda aslâ alâkası olmadığını bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-yı şehâdet-i şer‘iyye eylediklerinde, ba‘de’t-ta‘dîl mahâllerinde bi’t-taharrî tezkiye olunup şehâdetleri makbûle oldukdan sonra merkūme Sara meclis-i şer‘-i şerîfde merkūmân ile vech-i meşrûh üzere sulh olup menzil-i mezkûra müte‘allıka da‘vâdan merkūmânın zimmetlerini ibrâ ve menzil-i mezkûrda alâkası olmadığını ikrâr u i‘tirâf dahi etmeğin mûcebiyle müdde‘iye-i mezbûre Sara menzil-i mezkûr için mu‘ârazadan men‘ birle mâ-vaka‘a bi’t-taleb ketb olundu. Fî 22 B sene 1179. Şuhûdü’l-hâl: Araboğlu Mehmed b. el-Hâc Mehmed, İbrahim b. Osman, Hasan b. Osman, Kapanda sâkin Osman Ağa b. Ahmed, Molla Mehmed b. Ahmed, Muhzırlar kethüdâsı el-Hâc Mehmed, Uzun Osman tâbi‘-i Sarı Müslim, Hasan tâbi‘-i Sarı Müslim, İbrahim tâbi‘-i Sarı Müslim, Ali tâbi‘-i Sarı Müslim, Sarrâf Nikola ve İstavri, İstervan v. Panayot, Tristan v. Vinçor