İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 87 Hüküm no: 29 Orijinal metin no: [12-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahalinin bacalarını temizlemeleri ve yangından korunmaları hususunda mahalle imamları tarafından uyarılmaları Ateşden muhâfazaya ihtimâma emir. İstanbul Kādısı Fazîletlü Efendi Öteden beri mevsim-i şitâ hulûlünde tennûr ve sâir ateşden herkes hânelerini ve dükkânlarını muhâfazaya ihtimâm ve ocakların kurumlarını safha safha tathîr edegelmişler iken bu hilâlde emr-i muhâfazaya adem-i ihtimâmdan nâşî bi-kazâillâhi te‘âlâ ba‘zan tennûr ve ba‘zan ocakdan ateş zuhûru meşhûd olmağla bu husûsda ihtimâm olunması cümlenin lâzıme-i zimmeti olmağın imdi İstanbul’da vâki‘ mahâllât imamlarını ve esnâf kethüdâlarından san‘atları ateşe tevakkuf eden esnâf kethüdâlarını çağırdıp ocakların kurumlarını herkes tathîr ve kapısı önlerine döküp tennûr ve sâir ateşden hânelerini gereği gibi muhâfazaya herkes ihtimâm eylemelerini her mahâllenin imamı mahâllesi ahâlîsine ifâde ve tefhîm eylemek için tenbîh ve kezâlik san‘atları ateşe tevakkuf eden esnâf dahi gece dükkânlarında ateş bırakmayıp ocaklarında ve dükkânlarında olan ateşi gereği gibi muhâfaza eylemeleri husûsunu dahi her esnâfın kethüdâları esnâfına tefhîm eylemelerini tenbîh ve tesâmuh ve tekâsülleri mûcib-i ta‘zîr-i şedîd olacağını ifâde ve te’kîd ile tahzîre mübâderet eyleyesin deyü [buyruldu]. Fî 22 B sene [1]179.