İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 90 Hüküm no: 33 Orijinal metin no: [14-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa’nın, komşusu Hasan Ağa’nın evinin harem kısmına bakan penceresini tahta perde ile kapatması Keşf der-kurb-ı Şeyh Ebulvefâ der-mahalle-i Molla Gürânî Ma‘rûz, Sâdır olan fermân-ı âlîlerine imtisâlen kıbel-i şer‘-i şerîfden mürsel keşif nâibimiz müderrisîn-i kirâmdan es-Seyyid Halil Efendi hâssa mi‘mârlarından kâtib Mehmed Emin Halîfe ve diğer Mehmed Emin Halîfe ve sâir mazbutü’l-esâmi Müslimîn ile derûn-ı arzuhâlde mezkûr el-Hâc Yusuf Ağa b. Abdullah’ın mahmiye-i İstanbul’da eş-Şeyh Ebulvefâ Câmi‘-i şerîfi kurbünde Molla Gürânî mahâllesinde vâki‘ ma‘lûmü’l-hudûd menziline varıp akdeylediği meclis-i şer‘-i şerîfde mezbûr Yusuf Ağa’nın tarîk-i âm üzerine menzilinin ulyâsında vâki‘ odasının sonradan ihdâs eylediği bir yan penceresinden karşısında vâki‘ sâhib-i arzuhâl Hasan Ağa’nın makarr-ı nisvân olan harem odasının penceresine havâlesi olup ve rızâsıyla hâlâ havâlesini tahta perde ile def‘ edip lâkin yine vüstâsında vâki‘ odasının kezâlik ihdâs eylediği bir yan penceresinden olan havâlesini yine tahta perde ile def‘ etmiş iken bu esnâda ref‘ etmekle kemâ-fi’l-evvel def‘ eylesin deyü iddi‘â ve mezbûr Yusuf Ağa cevâbında zikr olunan pencerem müdde‘î-i mezkûr Hasan Ağa’nın havâlesini iddi‘a eylediği penceresinden mukaddem binâ olunup def‘-i havâle ona iktizâ etmiş iken ben rızâm ile def‘ etmişdim deyü penceresinin hudûsunu inkâr eylediğini mezbûr dâ‘îleri gelip ba‘de’l-inhâ mezbûr Hasan Ağa tarafından müseccel vekîli Halil Ağa meclis-i şer‘-i şerîfe gelip mezbûr Yusuf Ağa muvâcehesinde mârrü’z-zikr vüstâda vâki‘ pencerenin müvekkil-i mezbûr Hasan Ağa’nın penceresinden muahhar mezbûr Yusuf Ağa’nın ihdâs eylediğini mahâlle-i mezbûrede sâkin udûlden es-Seyyid el-Hâc Hüseyin ve Mustafa Çelebi nâm kimesneler şehâdetleriyle isbât etmeğin mûcebiyle kemâ-fi’l-evvel pencere-i mezkûrenin havâle-i meşrûhasını tahta perde ile def‘e mezbûr Yusuf Ağa’ya tenbîh olunduğu bi’l-iltimâs huzûr-ı âlîlerine i‘lâm olundu. El-emrü li-men-lehü’l-emr. Fî 19 B sene [1]179.