İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 89 Hüküm no: 32 Orijinal metin no: [13-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa ve Hasan Ağa’nın birbirlerinin evlerine olan zararlarını giderme hususunda taahhütte bulunmaları Keşif Ma‘rûz, Vârid olan fermân-ı âlîlerine imtisâlen savb-ı şer‘-i enverden mürsel müderrisîn-i kirâmdan keşif nâibimiz es-Seyyid Halil Efendi mi‘mâr ağa hulefâsından İsmail ve Ahmed nâm kimesneler ve sâir mazbûtü’l-esâmi Müslimîn ile sâhib-i arzuhâl Yusuf Ağa’nın menziline varıp akdeylediği meclis-i şer‘-i hatîrde menzil-i mezkûrun sokak aşırısında vâki‘ derûn-ı arzuhâlde mezkûr Hasan Ağa’nın menzilinin ulyâsında vâki‘ odasının bir yan ve üç orta pencerelerinden mezbûr Yusuf Ağa’nın kezalik ulyâsında makarr-ı nisvân olup Hasan Ağa’nın binasından mukaddem olan bir bâb odasının pencerelerine ve camlı sofasına havâlesi olup ve mezbûr Yusuf Ağa’nın dahi oda-i mezkûr mehâzîsinde bahçe tarafında vâki‘ mezbûr Hasan Ağa’nın binâsından muahhar ihdâs eylediği dîvânhâne ve bir bâb odasının bir yan ve üç orta pencerelerine havâlesi olduğu ba‘de’l-mu‘âyene mezbûr Hasan Ağa rızâsıyla çifte kapak ile bir yan ve bir orta penceresinin zikr olunan bahçe tarafında olan oda ve dîvânhânenin [14] havâlesini def‘a ta‘ahhüd eyledikde mezbûr Yusuf Ağa dahi kezâlik rızâsıyla bâlâda tahrîr olunan odasının ve camlı sofasının havâlesini sakfı üzerinde olan tahta perdenin kenârına havâle kat‘ oluncaya dek tahta perde zam ve ilhâk ile havâlesini def‘e ta‘ahhüd ve bu minvâl üzere beynleri tevfîk ve kat‘-ı münâza‘a eylediklerini mezbûr dâ‘îleri mahâllinde rızâlarıyla tahrîr ve gelip inhâ eylediği iltimâslarıyla huzûr-ı âlîlerine i‘lâm olundu. El-emrü li-men-lehü’l-emr. Fî 24 B sene [1]179.