İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 92 Hüküm no: 36 Orijinal metin no: [15-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Yazıcı isimli bakkal gediğinin Kasımpaşa’da vefat eden Bakkal İbrahim’in varisleri adına kaydedilmesi Kasımpaşa’da bakkāl dükkân gediği Ma‘rûz, Mahmiye-i Galata’ya muzâfe Kasımpaşa’da vâki‘ Câmi‘-i kebîr mahâllesinde sâkin iken bundan akdem vefât eden el-Hâc İbrahim b. Halil’in hasran vârislerinden zevce-i menkûhası olup arzuhâl eden evlâd-ı sıgārı Yakub ve Hafize’nin vasîleri mu‘arrefetü’z-zât Ümmügülsüm bt. İbrahim meclis-i şer‘-i enverde Galata ve Kasımpaşa bakkālları umûrunu idâre eden İstanbul Pazarbaşısı vekîli Ömer Çelebi ile Kasımpaşa bakkāllarından Yorgi ve Dimitri ve Anorna ve Yani muvâcehelerinde zevcim mezbûr câmi‘-i mezkûr kurbünde yirmi beş seneden beri bakkāl iken fevt oldukda sâkin olduğu dükkânını işbu hâzır bi’l-meclis Hüseyin nâm kimesne icâr ve icâresiyle ta‘ayyüş ederken bu esnâda mezbûrdan dükkân-ı merkūm için bakkāllar nizâmına dâhil olmayıp ve Başmuhâsebe’de dahi kaydı olmayıp bilâ-gedik olmağla bakkāl metâ‘ı bey‘ etdirmeziz deyü müstecir-i merkūmun kâr ü kisbine mümâna‘at etdiklerinde, ol dahi fesh-i icâre etmekle ben işbu sagīrler ile bî-ma‘âş kaldım deyü iddi‘â etdikde fi’l-vâki‘ mezbûrûnun yedlerinde olan Başmuhâsebe’den muhrec Galata ve Kasımpaşa bakkālları nizâmı defterinde dükkân-ı merkūmun kaydı olmayıp ve yine mezbûrûnun yedlerinde altmış beş senesinde verilen i‘lâmda dahi dükkân-ı merkūmun kaydı olmamağla müteveffâ-yı mezbûr bakkāla mahsûs metâ‘ı bey‘den men‘ olunduğu mastûr bulundukdan sonra mezbûr Ümmügülsüm’ün istirhâmıyla defter-i mezkûrda münderic Câmi‘-i kebîr mahâllesi kurbünde İbrahim Paşa dükkânında Abdi Yazıcı nâmıyla olan gedik tâife-i mezbûrûnun beynlerinde mahlûl olmağla verese-i mezbûrûnun bi-kadri’l-hısas üzerlerine kayd ve defterlerine şerh verilip fî-mâ-ba‘d zikr olunan dükkânda verese-i mezbûrenin müstecirleri mezbûr Hüseyin’in bakkāl metâ‘ı bey‘ine dahl ü ta‘arruz etmemek üzere ta‘ahhüd etmeleriyle minvâl-i meşrûh üzere Başmuhâsebe’de olan kayd-ı mezkûre dahi şerh verilmek bâbında merhameten fermân-ı âlîleri sudûrunu istid‘â eyledikleri iltimâslarıyla huzûr-ı âlîlerine i‘lâm olundu. Fî 27 B sene [11]79