İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 93 Hüküm no: 38 Orijinal metin no: [17-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a gelen arpadan arpacıların hisselerine göre dağıtım yapılarak arpanın pahalılaşmasına meydan verilmemesi Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u i‘lâmü’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kādısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki mahmiye-i İstanbul sûru hâricinde ve Boğaziçi’nde vâki‘ arpacılar kapandan ziyâde arpa alıp ve taşra etrâf kurâya ziyâde baha ile fürûht ve içlerinde ba‘zıları ihtikâr etmeleriyle Âsitâne’de arpanın kılletine ve bahasının tezâyüdüne bâ‘isdir deyü kapan arpacılarının inhâlarıyla sâdır olan fermân-ı âlîşâna imtisâlen mahâll-i mezbûreye kifâyet eden şa‘îrin mikdârını ta‘yîn için kapan nâibi ve kapan tüccârı ve arpacı esnâfı ma‘rifet ve ittifâklarıyla rü’yet olundukda mavna ile kapandan getirip telef olmak ihtimâli gālib olan mahâllerden nefs-i Üsküdar’da vâki‘ on dokuz aded arpa sergileri ashâbına senede doksan bin ve Beykoz’da vâki‘ bir aded arpacı sergisine on sekiz bin ve Tophane’de beşer aded arpacı sergileri ashâbına on dokuz bin sekiz yüz yirmi ve Kasımpaşa’da vâki‘ bir aded arpacı sergisine üç bin altı yüz ve Defterdâr İskelesi’nde iki aded arpacı sergisine yedi bin iki yüz ve Samatya iskelesinde vâki‘ iki aded arpacı sergisine altı bin iki yüz ve Davudpaşa iskelesi dâhilinde vâki‘ üç aded arpacı sergilerine on bin sekiz yüz ve Langa Yenikapısı dâhilinde bir aded arpacı sergisine beş bin dört yüz ve Kumkapı hâricinde vâki‘ üç aded arpacı sergilerine on sekiz bin keyl ki cem‘an bir yük seksen bin yirmi keyl şa‘îre bâliğ olup mâ‘adâsı kapan-ı dakīk kurbünde ve Hasır İskelesi’nde ve Bahçekapısı’nda olan sergilere ve fermân-ı âlîşânımla ta‘yîn olunan mahâllere ve sâir lâzıme-i ibâdullaha fürûhtu bulunagelip ve gemiler inkıtâ‘ında sergi ashâbı der-mahzen etdikleri şa‘îri onu on beşer ve dahi ziyâde fürûht âdetleri olup bi-temşiyetillâhi te‘âlâ bundan böyle şa‘îrin sefînelerden fürûhtu bulunduğu ve fiât Kapan-ı dakīk’de zabt ve her kim ne kadar şa‘îr alır ise onu dahi kayd ve işbu Üsküdar ve sâir mezkûr taşra iskeleler ashâbı vech-i meşrûh üzere bir senelik şa‘îrini aldıkdan sonra sene-i mezbûre dâhilinde gelen şa‘îrden iştirâsına müsâ‘ade olunmayıp bu vechile nizâma rabt olunur ise gelen şa‘îri telef ve izâ‘atdan sıyânet ve hadd-i i‘tidâli tecâvüz eder ise fiâtı mazbût olduğundan me’hazün-bih? müketteb hâsılı olmağla nizâm-ı beldeye evfak emr-i müstahsen olması melhûz olduğunu sâbıkā İstanbul kādısı Mevlânâ Mehmed Hamid -zîdet fezâiluhû i‘lâm etmeğin imdi i‘lâmı mûcebince [18] nizâm-ı mezbûr Başmuhâsebe’ye kaydolunmağla vech-i meşrûh üzere i‘mâl olunmak bâbında fermân-ı âlîşânım sâdır olmuşdur. Buyurdum ki, hükm-i şerîfim vardıkda bu bâbda sâdır olan emrim üzere amel edip dahi mevlânâ-yı mûmâ-ileyhin i‘lâmıyla nizâm-ı beldeye evfak emr-i müstahsen olması melhûzuyla verilen nizâm-ı mezbûr bu def‘a Başmuhâsebe’ye kaydolunmağla mûcebince sâdır olan işbu emr-i âlîşânımın mazmûn-ı itâ‘at-makrûnuyla âmil olup hilâfına bir dürlü rızâ ve cevâz göstermeyesiz, şöyle bilesiz, alâmet-i şerîfime i‘timâd kılasın. Tahrîren fi’l-yevmi’l-hâmis aşer [min] Şevvâl li-sene semânîn ve mi’ete ve elf. İslambol el-mahrûse