İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 94 Hüküm no: 39 Orijinal metin no: [18-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sığır kasabı Ahmed’in ortaklarıyla zimmetlerini ibra etmesi Ma‘rûz, Kasımpaşa’da sığır kasablarından arzuhâl eden Ahmed Çarşamba günü arz odasında ma‘kūd meclis-i şer‘-i hatîrde şerîki olup derûn-ı arzuhâlde mezkûr Süleyman b. Mehmed mahzarında mezbûr Süleyman ve gāibân ani’l-meclis Mehmed Emin ve İbrahim ile seksen Saferi gāyetine gelince yedi seneden beri şerîki olup sinîn-i mezkûrede fâideden benim hisseme yalnız bin guruş isâbet etmiş iken mezbûr Süleyman ketm ü ihfâ etmekle hesâbımız rü’yet olunmak matlûbumuzdur deyü da‘vâ ve kethüdâ ve ustaları ma‘rifetiyle hesâbları rü’yet olunmağa havâle olunmuş idi. Hâlâ ber-vech-i muharrer hesâbları rü’yet olundukda iki nefer kimesneye bin üç yüz kırk beş guruş deynleri zuhûr ve deyn-i merkūmdan mezbûr Ahmed’e üç yüz guruş isâbet ve fâideden dahi yüz otuz üç guruş zuhûr ve fâide-i merkūmeyi dahi zimmetleri olan ma‘lûmü’l-esâmi kimesnelerden havâle eylediklerinde mezbûr Ahmed dahi kabûl ve husûs-ı mezkûre müte‘allıka âmme-i da‘vâdan gerek mezbûr Süleyman’ın ve gerek şerîki mezbûrân Mehmed Emin ve İbrahim’in zimmetlerini ibrâ etdikde ol dahi mezbûr Ahmed’in kezâlik zimmetini ibrâ ve her biri âharın ibrâsını kabûl ve kat‘-ı münâza‘a eyledikleri mübâşirleri Mehmed Çavuş iltimâsıyla huzûr-ı âlîlerine i‘lâm olundu. fî 28 Cumâdelâhire sene 1180.