İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 118 Hüküm no: 67 Orijinal metin no: [34-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa Tavukçu dükkânında çalışanlar hakkında dükkânlarına nâmahrem kadınlar aldıklarına dair ihbarın dikkate alınamayacağı Hâssa Tavukçu Kârhânesinden istihbâr Ma‘rûz, Hâmiş-i arzuhâlde sâdır olan fermân-ı âlîşâna imtisâlen kıbel-i şer‘-i şerîfden Kâtib Mehmed Efendi dâ‘îleri irsâl ol dahi Sultân Ahmed Câmi‘-i şerîfi kurbünde Hâssa Tavukçu kârhânesi olan Güngörmez mahâllesinde vâki‘ mescid-i şerîfe varıp akdeylediği meclis-i şer‘-i hatîrde ahâlî-i mahâlleden arzuhâl eden Attâroğlu Hasan ile hâzirûn olan mahâlle-i mezbûre İmamı Ahmed Efendi ve Müezzin Molla Mustafa ve el-Hâc Mustafa ve Hasan Ağa ve Mahmud Ağa ve Mehmed Çelebi ve el-Hâc Osman ve Ahmed’den zâbitleri aşçıbaşı tarafından müte‘ayyen Halil Ağa ma‘rifetiyle ihzâr olunan kârhâne-i merkūmede Tavukçubaşı el-Hâc Veli ve Bölükbaşıları Musa ve Başeskileri Mehmed ve Uzun Mustafa ve Abdülkadir’in ve sâir neferâtının keyfiyet-i hâllerini suâl eyledikde neferât-ı mezkûrenin kârhânelerine nâ-mahrem avradlar getirdiklerini re’yü’l-ayn görmedik, lâkin mesmû‘umuz olmuş idi deyü semâ‘la eyledikleri ihbârları şer‘an mesmû‘a olmadığından mâ‘adâ arzuhâlde tahrîr olunduğu üzere neferât-ı mezkûrenin hilâf-ı şer‘-i şerîf hareketleri olduğunu bilir kimesne dahi bulunmadığı mezbûr dâ‘îleri mahâllinde tahrîr ve meclis-i şer‘-i şerîfe gelip alâ-vukū‘ihî inhâ edip, lâkin neferât-ı mezkûre fî-mâ-ba‘d dahi kendi hâllerinde olup bu misillü sû-i zan îrâs eder hareketde olmayıp ve civârlarında olan ibâdullahı dahi ta‘cîz ve tekdîrden mücânebet eylemeleri için zâbitleri olan Aşçıbaşı kullarına tenbîhi hâvî ihtiyâten emr-i âlîleri sudûrunda emr ü fermân hazret-i veliyyü’l-emrindir. Fî 24 Zilka‘de sene 1179.