İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 118 Hüküm no: 66 Orijinal metin no: [33-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hekimpaşazade Ali Paşa Vakfı’ndan olup ahalinin emniyetsiz olduğunu bildirdiği Altımermer’de yanan alçıcı fırınının keşfi Altımermer’de vâki‘ Hekimbaşızâde sadr-ı esbak Ali Paşa Vakfı’ndan Alçıcı fırınına müte‘allık Ma‘rûz, Altımermer kurbünde Sancakdâr Hayreddin mahâllesi ahâlîlerinden İmam Ahmed Efendi ve Mehmed Efendi ve el-Hâc Mehmed ve el-Hâc İbrahim Efendi ve Hâfız Mehmed Efendi ve Abdurrahman Efendi ve Abdi Ağa ve Mustafa Ağa ve es-Seyyid Halil Ağa ve Abdülcelil Ağa ve es-Seyyid Osman Ağa ve Ömer Ağa meclis-i şer‘-i şerîfde mahâlle-i mezbûrede vâki‘ Alçıcı fırını müstecirleri arzuhâl eden el-Hâc Mehmed ve Fâtıma ve Saliha ve Hadîce evlâdi’l-hâc Osman ile fırın-ı mezkûrda hâlâ alçıcı olan Kersih nâm zimmî muvâcehelerinde bundan akdem muhterik olan mezkûr fırın mahâlle içinde olup birkaç def‘a tutuşmağla güç ile itfâ olunup ve sirâyeti ihtimâli ağleb olmağla emniyetimiz yokdur deyü cümlesi takrîr ve fî-mâ-ba‘d alçı fırını binâ olunmamasını istid‘â ederler. Lâkin fırın-ı mezkûr sadr-ı esbak Hekimbaşızâde Ali Paşa merhûmun vakfı olup ve vakf-ı merkūm Dârüssa‘âdeti’ş-şerîfe ağaları nezâretlerinde olan evkāfdan olmağla vakf-ı mezkûra ve fırın-ı merkūm müstecirlerine gadr olmayacak sûretde [34] fırın-ı merkūmun yerine âhar akār binâ olunmak mı münâsibdir yâhud ahâlî-i mahâllenin emîn olacakları sûretde yine alçı fırını binâ olunmak mı münâsibdir bi’n-nefs mi‘mâr ağa kullarıyla Haremeyn-i şerîfeyn müfettişi efendi dâ‘îleri vakf-ı mezkûr mütevellîsi ve mezbûr müstecirler ve ahâlî-i mahâlle hâzır oldukları hâlde mahâllî mu‘âyene ve iktizâsı i‘lâm olunmak bâbında emr ü fermân hazret-i veliyyü’l-emrindir. Fî 24 Za sene 1179.