İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 120 Hüküm no: 69 Orijinal metin no: [35-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Ahmed’e olan borcunu ödemesi hususunda ortağı Boya’ya tenbihte bulunulması Tophane’de Hendekbaşı’nda ekmekçi kurbünde sermâye, 909,5 guruş Ma‘rûz, Kapan ustalarından olup Tophane’de Hendekbaşı’nda ekmekçi fırını olan Ahmed b. Hüseyin şerîki olmak üzere fırın-ı mezkûra vaz‘ eylediği Boya v. Duka nâm zimmînin yetmiş yedi senesinde ameliyle fâiz ve masârıfının hesâbını gördükde mezbûr Ahmed’in sermâyesinden beş yüz seksen dört guruş zimmetinde zuhûr ve meblağ-ı mezkûr beş yüz seksen dört guruşu kendi masârıfına sarfla istihlâk etmekle deyni olduğuna kat‘iyyen ikrârını mezbûr Ahmed lede’l-murâfa‘a udûlden Osman b. Mustafa ve el-Hâc Mehmed Emin b. el-Hâc Ömer nâm kimesneler şehâdetleriyle ba‘de’l-isbât ve işbu yetmiş dokuz senesi için dahi altı gün mukaddem Galata’da Kapıiçi’nde vâki‘ odada hesâb görüp yine sermâyeden merkūm Boya zimmetinde üç yüz yirmi beş buçuk guruş ve bir rub‘ zuhûr, kezâlik umûruna sarfla istihlâk etmekle deyni olduğuna kat‘iyyen ikrârını udûlden el-Hâc Mehmed b. el-Hâc İbrahim ve el-Hâc Mustafa b. Mehmed nâm kimesneler şehâdetleriyle isbât etmeğin mûcebiyle deyn-i mecmû‘-ı mezkûr dokuz yüz dokuz buçuk guruş ve bir rub‘un edâsına merkūm Boya zimmîye tenbîh olunduğu tescîl olunup bi’l-iltimâs huzûr-ı âlîlerine i‘lâm olundu. Fî 25 Zilka‘de sene 1179.