İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 123 Hüküm no: 74 Orijinal metin no: [36-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın Karabaş mahallesinde kale dibinde yanan vakıf dükkânlarının yeniden inşasına izin talebi Keşf der-kurb-ı hâric-i Balat Ma‘rûz, Sâdır olan fermân-ı âlîlerine imtisâlen savb-ı şer‘-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri ve hâssa mi‘mârlarından Mehmed Emin ve İsmail halîfeler ile mahmiye-i İstanbul’da Balatkapısı hâricinde Karabaş mahâllesinde vâki‘ etrâf-ı erba‘ası kal‘a duvarı ve kuleleri ve tarîk-i âm ile mahdûd Haremeyn-i muhteremeyn nezâretinde olan evkāfdan muhterik arsa üzerine varıp akdeylediği meclis-i şer‘-i şerîf-i enverde sâhibe-i arzuhâl Âişe Hanım bt. Hüseyin b. Hasan Efendi tarafından sâbitü’l-vekâle zevci Hasan Bey b. İbrahim işbu mu‘âyene olunup müvekkilem ve zevcem mezbûre Âişe Hanım tasarrufunda olan arsa-i mezkûre üzerinde fi’l-asl dört kat Yahûdîhâne ve tahtında dükkânlar olup bin yüz yetmiş sekiz senesi Ramazan-ı şerîfi’nin yirminci gecesi vâki‘ olan harîkde muhterik olmağla bu esnâda Kapan-ı dakīk hâricinde ittisâl-i kal‘ada vâki‘ binâsına ruhsat verilen ebniyeye kıyâsen ben dahi bi’l-vekâle dükkânlar binâsına mübâşeret eylediğimde bi-kazâillâhi te‘âlâ harîk vukū‘unda tehattî ve tecâvüzden ibâdullahı sıyâneten kal‘a semtlerinde binâ olunacak menâzil ve dekâkînin kal‘a duvarından bu‘d ve fâsılası bir araba mürûr edecek [37] mikdârı olmak bâbında bin yüz yetmiş sekiz senesi Rebî‘ülevveli’nde sâdır olan fermân-ı âlîşân ile hâlâ ser-mi‘mârân-ı hâssa ağa tarafından beni binâdan men‘ ederler. Lâkin arsa-i mezkûrenin arzen bir tarafı dört zirâ‘ ve dokuz parmak ve bir tarafı sekiz zirâ‘ ve dört parmak olmağın ol mikdâr fâsılaya tahammülü olmadığından mâ‘adâ kal‘a duvarının on sekiz zirâ‘ mikdârı irtifâ‘ı olup ve derûnu dahi Yahûdî bî‘ası bahçesi olmağla ma‘azâllâhu te‘âlâ harîk vâki‘ olursa da tahattî ve tecâvüzden kemâ-yenbağī emniyet hâsıladır ve bu sûretde arsa-i merkūme üzerine bâ-re’y-i mütevellî ancak dört zirâ‘ kad ile sekiz aded dükkân binâsına izin ve ruhsat buyrulmak bi’l-vekâle matlûbumdur dedikde mi‘mârân-ı mezbûrân dahi misâha ve tahmîn eyleyip hâl minvâl-i muharrer üzere olduğunu ihbâr ve bu vechile mûmâ-ileyh Hüseyin [Hasan] Bey kullarının bi’l-vekâle istid‘â-yı inayet eylediğini mezbûr dâ‘îleri mahâllinde tahrîr ve gelip ümenâ ile inhâ eylediği bi’l-iltimâs huzûr-ı âlîlerine i‘lâm olundu. Fî 20 Za sene 1179.