İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 124 Hüküm no: 76 Orijinal metin no: [37-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yarım Han’ın sahibi Hüseyin’in, İsa Bey, Fatıma ve Hamide arasındaki lağım ve bina davasında anlaşma sağlanması Keşf der-kurb-ı Zindankapısı Ma‘rûz, Sâdır olan fermân-ı âlîlerine imtisâlen <> taraf-ı dâ‘îlerinden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri ve Haremeyn-i muhteremeyn müfettişi efendi dâ‘îleri tarafından mürsel es-Seyyid Mehmed Efendi ve evkāf müfettişi mevâlî-i izâmdan Muradzâde es-Seyyid Ahmed Efendi dâ‘îleri tarafından meb‘ûs Hayrullah Efendi dâ‘îleri hâssa mi‘mârlarından Abdullah ve Ahmed nâm halîfeler ile mahmiye-i İslambol’da Zindankapısı dâhilinde Canbazlar Odaları karşısında vâki‘ tarîk-i hâssın üzerine varıp Ayasofya-i kebîr mütevellîsi el-Hâc Abdullah Ağa ve Abdüsselam Efendi Vakfı mütevellîsi vekîli Mehmed Ağa ve Kiremidçi Ahmed Çelebi Vakfı mütevellîsi Bektaş Efendi ve sâir Müslimîn huzûrlarında akdeyledikleri meclis-i şer‘-i şerîfde sâhib-i arzuhâl el-Hâc Hüseyin tarîk-i mezkûr erbâbından İsa Bey ve Fâtıma Hatun ve Hamide Hatun taraflarından vech-i âtî üzere vekîlleri olan el-Hâc Mehmed ile arzuhâlinde mezkûr el-Hâc Ahmed ve el-Hâc Mustafa ve el-Hâc Memiş ve es-Seyyid el-Hâc Ahmed ve el-Hâc Musa mahzarlarında işbu tarîk-i hâss-ı mezkûr intihâsında vâki‘ Abdüsselam vakfından şerîkim ile tasarrufumda olan Yarım Han demekle ma‘rûf hanın ve kule odalarının ve Küçük Laz Hanı demekle ma‘rûf hanın kârizi tarîk-i mezkûrda vâki‘ lağımdan akagelmiş iken mezbûrûn benim için bi-gayrı hakkın icrâ eder deyü da‘vâya tasaddî ve sed etdiklerinde ben dahi mezbûrûndan evkāf-ı mezkûreden tasarruflarında olup tarîk-i hâss-ı mezkûrda olan Emir Hanı demekle ma‘rûf ulyâsında sofa ve saçaklar ve süflâsında kenîfler binâsıyla tarîk-i mezkûru tazyîk ve zıyâsını kat‘ eylediler deyü da‘vâya tasaddî etmiş idim. El-hâletü hâzihi ben da‘vâ-i mezkûremden fâriğ olmağla mezbûrûn dahi sedd-i mezkûrdan fâriğler olup kâriz-i merkūmun zikr olunan lağmından kemâ-fi’l-evvel icrâsına mümâna‘at etmemek üzere beynimiz tevfîk olundu deyü mezbûr el-Hâc Hüseyin’in takrîrini mezbûrûn tasdîk ve mütevellîler dahi bu vechile re’y etmeleriyle kat‘-ı münâza‘a eylediklerini mevlânâ-yı mezbûrûn dâ‘îleri mahâllinde tahrîr ve gelip inhâ eyledikleri bi’l-iltimâs huzûr-ı âlîlerine i‘lâm olundu. Fî 21 Za sene [11]79.