İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 125 Hüküm no: 77 Orijinal metin no: [38-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avlonyalı Ali Mir’in sarraf Filibos’a olan borcunu ödemesi hususunda tenbihte bulunulması Ali Mîr nâm kimesneden hukūk, 6012 guruş Ma‘rûz, Rikâb-ı müstetâba arzuhâl eden Avlonyalı Ali Mîr nâm kimesnenin hasmı Sarrâf Filibos Çarşamba günü arz odasında huzûr-ı âlîde ma‘kūd meclis-i şer‘-i şerîfde mezbûr Ali Mîr ile terâfu‘larında yetmiş dokuz senesine mahsûben Gümülcine cizyesi Giridî Ahmed Efendi kefâletiyle mezbûr Ali Mîr’in uhdesinde olmağla cizye-i merkūmenin kā‘ide-i mîriye üzere taksît-i evveli için bi-şarti’r-rücû‘ emriyle malımdan izzetlü defterdâr efendi tarafına altı bin on iki guruş teslîm edip hattâ mezbûr Ali Mîr sene-i mezbûre Recebi’nin beşinci günü sâbık Başbâkī kulu Hüseyin Bey’in Demirkapısı’nda vâki‘ menzilinde bi-şarti’r-rücû‘ emriyle malımdan altı bin on iki guruş teslîm eylediğimi ikrâr ve târîh-i mezkûr ile müverrah ve hatemiyle mahtûm Hammâmî el-Hâc Mehmed ve Fodulacı Mehmed Tahir ve Yazıcı Osman nâm kimesneler kefâletleriyle karz unvânıyla işbu temessükü vermiş idi deyü takrîrine mutâbık bir kıt‘a temessük ibrâzıyla da‘vâ etdikde gıbbe’l-istintâk merkūm Ali Mîr cevâbında ikrâr-ı meşrûhunu ve temessük-i mezkûrun kendinin olduğunu mu‘terif olup lâkin hîn-i ikrârında hasta olup aklım bi’l-külliye zâil olmağla ikrârım mu‘teber değildir demekle merkūm Sarrâf Filibos mezbûr Ali Mir’in hîn-i ikrârında tasarrufâtı nâfiz-i âkıl olduğuna Süleyman Paşa Hanı’nda sâkin Çukadâr İsmail b. Mehmed ve Hüseyin Bey etbâ‘ından Süleyman b. Ali nâm kimesneleri ikāme, onlar dahi edâ-yı şehâdet-i şer‘iyye edip mahâllerinden tezkiye olundukda udûlden oldukları ihbâr olunmağla şehâdetleri makbûle olmağın mûcebiyle meblağ-ı mezkûr altı bin on iki guruşun edâsına mezbûr Ali Mîr’e şer‘an tenbîh olunduğu mübâşiri Osman Çavuş kulları iltimâsıyla huzûr-ı âlîlerine i‘lâm olundu. Fî 28 min-Zilka‘de sene 1179.