İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 128 Hüküm no: 81 Orijinal metin no: [39-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa ve İsmail’in Gulami Dede Vakfı mütevelliliği hakkında Mehmed Emin ile aynı derecede ve eşit oldukları Gulâmî Ali Dede Vakfı’nın evlâdiyet üzere ale’s-seviye müşâreket Sâhib-i arzuhâl Mustafa tarafından husûs-ı âti’z-zikrde vekîli olduğu sâbit olan es-Seyyid İsmail meclis-i şer‘-i şerîfde mahmiye-i İslambol’da nezâret-i dâ‘îlerinde olan evkāfdan Hacı Bayram Kaftânî mahâllesinde vâki‘ Gulâmî Ali Dede Vakfı’nın evlâdiyet üzere hâlâ zâviyedârı ve müstakillen mütevellîsi olan derûn-ı arzuhâlde mezkûrü’l-ism Mehmed Emin ile terâfu‘larında vakf-ı mezkûrun tevliyet ve gallesi mutlakā evlâdına ve evlâd-ı evlâdına meşrûta olup müvekkil-i mezbûr Mustafa dahi evlâd-ı vâkıfdan olup mezbûr Gulâmî Ali Dede’nin oğlu İbrahim oğlu Mustafa’nın kızı Âişe’nin oğlu [40] diğer İbrahim’in oğlu olup ve hâlâ mütevellî olan mezbûr Mehmed Emin dahi mezbûr Âişe’nin diğer oğlu Mehmed Sadık’ın oğlu olup yine evlâd-ı vâkıfdan hâzır bi’l-meclis İsmail dahi mezbûre Âişe’nin diğer oğlu Halil’in oğlu olmağla ve dereceleri berâber olduğu mezbûr Mehmed Emin’in ikrâr ve i‘tirâfı ve vekîl-i mezbûr ile mezbûr İsmail’in tasdîkiyle sâbit ve zâhir olmağla vekîl-i mezbûr yedinde olup ibrâz eylediği fetvâ-yı şerîfe mûcebince mezbûrân Mustafa ve İsmail tevliyet ve gallede mezbûr Mehmed Emin ile ale’s-seviye müşâreket iktizâ eylediği imtisâlen li’l-emri’l-âlî huzûr-ı âlîlerine i‘lâm olundu. Fî 28 min-Zilka‘de sene [1]179.