İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 127 Hüküm no: 80 Orijinal metin no: [39-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef’in Yazıcı Halil aleyhindeki alacak davasında anlaşma sağlanması Mukassatan sulh, 1000 guruş. Ma‘rûz, Sofyalı Sabuncuoğlu demekle ma‘rûf olup üç sene mukaddem hâlik olan Sarrâf Harun v. Yasef v. Harun nâm Yahûdî’nin oğlu ve hasran vârisi olduğu şer‘an sâbit olan mahmiye-i İslambol’da mütemekkin hâmil-i arzuhâl Yasef meclis-i şer‘-i şerîfde Sofya ahâlîsinden olup mahmiye-i mezbûrede hâlâ misâfir olan arzuhâlde mezkûrü’l-ism Yazıcı Halil b. Mustafa nâm kimesne mahzarında işbu yedimde olup mezbûr Halil’in hat ve hatemini hâvî bin yüz altmış altı senesi târîhiyle müverrah temessük mantûkunca mezbûr Halil zimmetinde babam hâlik-i merkūm Harun’un cihet-i karzdan bin sekiz yüz bir guruş ve bir sâ‘at ve bir kürk bahasından dahi üç yüz altmış guruş ki cem‘an iki bin yüz altmış bir guruşun üç yüz yetmiş iki guruşunu babam merkūm sağlığında mezbûr Halil yedinden ahz ve bin yedi yüz seksen dokuz guruş zimmetinde bâkī kalıp bana mevrûs olmağla taleb ederim deyü müdde‘âsına merkūm Yasef bir şâhid ikāme ve şâhid-i âhar ikāmeti esnâsında merkūm Yasef bâ-vesâtet-i Müslimîn bin guruş üzerine merkūm Halil ile sulh olup lâkin merkūm Halil’in bedel-i sulhu hâlâ edâya kudreti olmamağla beher sene tamâmında ikişer yüz guruş vermek üzere mukassatan beş sene tamâmına değin imhâl ve ziyâde yedi yüz seksen dokuz guruşa müte‘allıka da‘vâdan mezbûr Halil’in zimmetini ibrâ ve iskāt etdikde ol dahi tasdîk ve ibrâyı kabûl ve müddet-i mezkûre tamâmına dek bedel-i merkūm bin guruşu edâya ta‘ahhüd edip kat‘-ı nizâ‘ eyledikleri rızâlarıyla tescîl ve mübâşiri kapıkethüdâsı kulları iltimâsıyla huzûr-ı âlîlerine i‘lâm olundu. Fî 28 Za sene 1179.