İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 129 Hüküm no: 84 Orijinal metin no: [40-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Piyo v. Bizo’nun Ekmekçi İbrahim aleyhindeki alacak davasında anlaşma sağlanması Çatalfırın’da Ekmekçi Sulhu, 72 [guruş] Ma‘rûz, Mahmiye-i İstanbul’da Çatalfırın’da bundan akdem destgâhdâr olan hâmil-i arzuhâl Piyo v. Bizo meclis-i şer‘-i şerîfde fırın-ı mezkûrda hâlâ ekmekçi olan arzuhâlde mezkûr İbrahim b. el-Hâc Mansur mahzarında karındaşım olup bundan akdem hâlik olan Salnişa nâm zimmînin fırın-ı mezkûrda altı yüz guruş sermâyesi olup hâlik olmağla meblağ-ı mezkûr veresesi olan zevcesiyle sagīr oğlu Petro’ya isâbet etmekle ben dahi zevcesi mezbûre tarafından meblağ-ı mezbûr altı yüz guruşu kabz ve bir sene fırın-ı mezkûrda amel edip ba‘dehû mezbûr İbrahim fırın-ı mezkûra yetmiş guruş malından sermâye koyup benimle şerîk olmağla bir sene dahi ben amel edip lâkin altı yüz guruş zarâr etmekle zarâr-ı mezkûrun nısfını zâmin olsun deyü eylediği da‘vâsı mesmû‘a olmayıp şirket-i mezkûr sahîha olduğu sûretde zarâr re’s-i mallarına göre iktizâ eylediğinden mâ‘adâ müdde‘î-i mesfûr sekiz ay mukaddem mezbûr İbrahim ile fırın-ı mezkûrda hesâb görüp ve aslâ sermâyesi olmadığını ikrâr ve müddet-i mezkûrede ameli için mezbûr İbrahim ile yetmiş iki guruş bedel-i makbûz mukābelesinde sulh olup husûs-ı mezkûra müte‘allıka âmme-i da‘vâdan mezbûr İbrahim’in zimmetini ibrâ ve iskāt eylediği udûl-i müzekkâtdan Ekmekçiler Kethüdâsı Vekîli el-Hâc Mehmed Emin b. Ömer ve Ekmekçi Ustalarından es-Seyyid el-Hâc Bekir b. Osman ve Molla Ahmed b. Hüseyin nâm kimesneler şehâdetleriyle lede’l-murâfa‘a sâbit olmağla mûcebiyle müdde‘î-i merkūm Piyo bi-gayrı vechin mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî-selhi Zilka‘de sene 1179.