İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 130 Hüküm no: 85 Orijinal metin no: [41-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ambar-ı amireden ekmekçilere dağıtılacak buğdayın fiyatının belirlenmesi Anbardan habbâzâna tevzî‘ olunan hıntaların fiâtı ve ta‘ahhüdleri Ma‘rûz, Habbâzânın işbu yetmiş dokuz senesinde anbardan aldıkları envâ‘ hıntanın fîleri vaz‘ı husûsu için hâlâ Tersâne-i âmire emîni izzetlü İbrahim Sarim Efendi ma‘rifeti ve ma‘rifet-i şer‘le çaşni tutuldukdan sonra emr ve re’y olunduğu üzere habbâzân meclis-i şer‘-i şerîfe ihzâr ve muvâcehesinde Galos hıntasına altmış sekiz akçe ve Selanik hıntasına altmış dört akçe ve Orfan hıntasına altmış bir akçe ve Mora hıntasına elli altı akçe ve Karaağaç hıntasına kezâlik elli altı akçe ve cedîd ve atik Tekfurdağı hıntalarına altmış ikişer akçe fî vaz‘ olunduğu üzere ve nân-ı azîzin kerestesi şimdiden ziyâde beyaz eylemelerine mu‘âdil olmak üzere çaşni vechi üzere iktizâ eden fazlanın bir mikdârını afv ve çüründü ve kepek maddelerinden ve iki akçe anbardan kapana nakli masraflarından dahi iğmâz olunduğu ifâde ve ifhâm olundukda nizâm ustalarından hâzır olanlardan her biri fiât-ı mezkûreye râzılar olup minvâl-i meşrûh üzere bi-kadri’l-hısas aldıkları hıntaların semenlerini edâya ta‘ahhüd eyledikden sonra ta‘ahhüdlerini te’yîd ve te’kîd için eğer içimizden biri ta‘ahhüd-i mezkûra mugāyir arzuhâle cesâret ederse derhâl ahz u te‘dîb olunması bizim dahi matlûbumuz dedikleri iltimâslarıyla huzûr-ı âlîlerine i‘lâm olundu. Fî 2 Zilhicce sene 1179.