İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 136 Hüküm no: 92 Orijinal metin no: [44-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Alaeddin Tekkesi’nin yanan menzil ve odalarının yeniden inşa olunması Keşf-i Tekye-i Şeyh Alaeddin der-mahalle-i Sofular. Ma‘rûz, Vârid olan fermân-ı âlîlerine imtisâlen savb-ı şer‘-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından Kâtib Mehmed Emin Halîfe ve İsmail Halîfe ve sâir ümenâ-yı şer‘le mahmiye-i İslambol’da Yeni odalar kurbünde Sofular mahâllesinde vâki‘ eş-Şeyh Alaeddin Efendi Tekyesi’ne varıp huzûr-ı Müslimînde akdeylediği meclis-i şer‘-i şerîf-i enverde tekye-i mezbûrenin hâlâ şeyhi ve ber-vech-i meşrûta mütevellîsi olan sâhibü’l-arzuhâl eş-Şeyh İbrahim Efendi b. Mehmed mütevellîsi olduğum tekye-i mezbûrenin on sene mukaddem harem tarafında olan binâsı muhterik olup ancak iki bâb odası kalıp onlar dahi harâb olmağla bir vechile kābil-i süknâ olmayıp ve vakıfda dahi binâsına müsâ‘ade olmamağla vakf-ı mezkûre zamânıyla nemâ geldikde rücû‘ şartıyla bi’l-istidâne zikr olunan harâb odaların ol vakitde enkāz-ı mevcûdesi tahmîn ve takvîm olundukda kıymetleri ancak altmış guruşa bâliğ olmağla enkāz-ı mezkûre idhâliyle tekye-i merkūmenin hudûdundan olan Ahmed Paşazâde arsası tarafından harem olmak üzere ulyâda bir bâb oda ve bir sofa ve kenîf ve mağsel ve vüstâda iki bâb oda ve dehliz ve nerdüban <> ve süflâda matbâh ve kilâr ve bunlardan münfasıl fevkānî bir bâb oda ve dehliz ve bir nerdüban ve tahtında bir mağsel ve kömürlük ve harem havlusunda terbî‘an beşer zirâ‘ bir havuz ve hâricen bir bâb Şeyh odası ve iki derviş odası ve üç mahâlde taş duvar ve yine üç mahâlde yüz zirâ‘ künk döşeme su yolu ve iki aded kurşun boru ve üç yüz elli zirâ‘ badana ve yetmiş beşer zirâ‘ kaldırım kadr-ı kifâye binâ olunmak muktezî olmağla bi’l-izni’ş-şer‘î ben ber-vech-i muharrer rücû‘ şartıyla istidâne ve ebniye-i mezkûreyi binâ etmekle misâha ve keşf ve tahmîn ve takvîm olunmak bi’t-tevliye matlâbumdur dedikde mi‘mârân-ı mezbûrân dahi zikr olunan ebniyeyi misâha eylediklerinde bi’l-cümle ebniyesi iki yüz on bir zirâ‘ ve mebniyen kıymeti bin yüz dokuz guruş doksan iki akçe ve sâir zikr olunan duvarlar ve su yolları ve iki aded kurşun boru ve havuz ve badana ve kaldırım ve ihrâc-ı mezbele ve hammâliye ve masârıf-ı sâire ve lâzıme iki yüz doksan beş guruş ve beş akçe ki cem‘an bin dört yüz on beş guruş beş akçeye bâliğ ve enkāz-ı mezkûre kıymeti tenzîl olundukda bin üç yüz elli dokuz guruş yirmi yedi akçe ile olur. Ebniye-i mezkûre noksân ile olmaz deyü icmâ‘ ve ittifâk eyledikleri mezbûr dâ‘îleri mahâllinde tahrîr ve ümenâ ile gelip inhâ eyledikleri huzûr-ı âlîlerine i‘lâm olundu. Fî 28 min-Zilka‘de sene 1180.