İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 135 Hüküm no: 91 Orijinal metin no: [43-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mehmed’in inşa ettirdiği evinin, İbrahim b. Hüseyin’in haremlik kısmına bakan pencerelerinin kapatılması Keşfe havâle, der-mahalle-i Hoca Hayreddin der-kurb-ı Malta Çarşısı Ma‘rûz, Sâdır olan fermân-ı âlîlerine imtisâlen kıbel-i şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından Abdullah ve İsmail Halîfeler ve sâir ümenâ-yı şer‘le mahmiye-i İstanbul’da Malta Çarşısı kurbünde Hoca Hayreddin mahâllesinde vâki‘ Hekim Mehmed Efendi Vakfı’ndan arzuhâlde mezkûrü’l-ism Hüseyin b. Mehmed’in müceddeden binâ ve ihdâs eylediği menzile varıp huzûr-ı Müslimînde akdeylediği [44] meclis-i şer‘-i şerîfde mütevellî-i vakf hâzır olduğu hâlde menzil-i mezkûrun tabaka-i ulyâsında vâki‘ bir bâb oda ve sofasının altı penceresinden ve vüstâda vâki‘ kezâlik bir bâb oda ve sofasının altı penceresinden ashâb-ı arzuhâlden es-Seyyid İbrahim b. Hüseyin’in menzilinin ulyâsında ve vüstâsında vâki‘ makarr-ı nisvân olan oda ve sofalarının mevâzi‘i görünüp havâle zarârı olduğu bi’l-müşâhede sâbit ve zâhir olup ve havâle-i mezkûre tahta perde ile gereği gibi ref‘ olur deyü mi‘mârân-ı mezbûrân ba‘de’l-ihbâr merkūm Hüseyin dahi havâle-i mezkûresini def‘e ta‘ahhüd eylediğini mezbûr dâ‘îleri mahâllinde tahrîr ve gelip ümenâ-yı şer‘le inhâ eylediği bi’l-iltimâs huzûr-ı âlîlerine i‘lâm olundu. Fî-gurreti Zilhicce sene 1179.