İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 137 Hüküm no: 94 Orijinal metin no: [45-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hüsrev Vakfı mütevellisi iken vefat eden Ömer Efendi’nin vakfa olan borcunun terekesinden tahsil olunması Molla Hüsrev Vakfı’nın îrâdından Kāimmakām Ömer Efendi zimmetinde bâkī kalıp terekesinden zevcesine hüküm, 235 [guruş] Ma‘rûz, Mahmiye-i İslambol’da nezâret-i dâ‘îlerinde olan evkāfdan merhûm Molla Hüsrev Vakfı’nın mütevellîsi olan Bostanî es-Seyyid İsmail b. Ali meclis-i şer‘-i hatîrde vakf-ı mezkûre kāimmakām iken bundan akdem vefât eden kuzâtdan Ömer Efendi b. Mehmed’in verese-i münhasırasından zevce-i menkûhası ve evlâd-ı sıgārı es-Seyyid Mehmed ve Şerîfe Hanife’nin vasiyy-i mansûbesi olmağla terekesine vaz‘-ı yedi mütehakkık olan mu‘arrefetü’z-zât Şerîfe Âişe bt. Ali mahzarında mezbûr Ömer Efendi kāimmakāmlığı zamânında mütevellîsi olduğum vakf-ı mezkûr îrâdından ba‘de-ihrâci’l-masârıf sekiz yüz elli dokuz guruş kabz ve kendi masârıfına sarfla istihlâk etmekle mezbûr ile yetmiş altı senesinde ba‘de’l-muhâsebe murâfa‘a olup işbu yedimde olan i‘lâm-ı şer‘î mantûkunca meblağ-ı mezkûr zimmetinde vakf-ı mezkûra vâcibü’l-edâ deyni olduğunu ikrâr u i‘tirâf ve dört yüz guruşu vakıf için bana edâ ve dört yüz elli dokuz guruşunu kable’l-edâ fevt olmağla zevce-i mezbûrenin müteveffâ-yı mezbûrun terekesinden bâ-defter-i kassâm makbûzu olan doksan yedi buçuk guruş on beş akçe ile hâric ez-defter bin yüz guruşdan makbûzu olan yüz otuz yedi buçuk guruş ki cem‘an iki yüz otuz beş guruş on beş akçeyi bi’t-tevliye taleb ederim deyü müdde‘âsı zevce-i mezbûre Âişe’nin bi’d-defa‘ât yemînden nükûlüyle sâbit olmağın mûcebiyle müdde‘â-bih olan meblağ-ı mezkûr dört yüz elli dokuz guruşun iki yüz otuz beş guruşunu zevce-i mezbûre Âişe’nin ber-vech-i muharrer makbûzu olan hissesinden ba‘de’l-hükm bâkīsi sagīrân-ı mezbûrânın bülûğ ve nükûllerine tevkīf olunduğu bi’l-iltimâs huzûr-ı âlîlerine i‘lâm olundu. Fî 5 min-Zilhicce sene 1179.