İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 138 Hüküm no: 95 Orijinal metin no: [45-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in vefat eden kardeşi Osman’ın varisleri aleyhindeki miras davasının geçersiz olduğu Ma‘rûz, Gemlik kasabasına tâbi‘ Armudlu karyesi sâkinelerinden sâhibe-i arzuhâl mu‘arrefetü’z-zât Şerîfe Hadîce bt. Mehmed nâm hatun Çarşamba günü arz odasında huzûr-ı âlîde ma‘kūd meclis-i şer‘-i şerîfe ihzâr etdirdiği karındaşı olup beş sene mukaddem karye-i mezbûrede fevt olan es-Seyyid Osman’ın verese-i münhasırası olmağla terekesine vâzı‘ü’l-yed oldukları mütehakkık olan sulbiye kebîre kızı Afife tarafından husûs-ı âti’z-zikrde vekîli zevci es-Seyyid Halil ve diğer kızı Nefise tarafından kezâlik vekîli zevci es-Seyyid İbrahim ile sulbî kebîr oğlu Mehmed Emin mahzarlarında kırk sene mukaddem fevt olan babam mezbûr Mehmed’in verâseti zevcesi anam Fâtıma ile karındaşım olan işbu mezbûrûnun murisleri mezbûr el-Hâc Osman’a münhasıra olmağla babam mezbûrun terekesinden karye-i mezbûrede vâki‘ bir bâb menzili ile anam mezbûre Fâtıma’nın terekesinden mahmiye-i İslambol’da vâki‘ bir bâb menzilini mezbûr el-Hâc Osman âhara altı yüz guruşa bey‘le istihlâk eylediğinden mâ‘adâ yine anam mezbûrenin terekesinden karye-i mezbûrede vâki‘ bir kıt‘a mülk kestâneliğini ve üç kıt‘a bağlarını zabt etmekle işbu yedimde olan hüccet mantûkunca mezbûr el-Hâc Osman’ın hayâtında bin yüz yetmiş bir senesi Zilka‘desi’nin onuncu günü taleb ve da‘vâ sadedinde olduğumda bâ-vesâtet-i Müslimîn karye-i mezbûrede vâki‘ hudûdu hüccet-i mezkûrede mastûr yirmi ırgatlık girizmesiyle bir kıt‘a bağ üzerine sulh olup gerek babamın ve gerek anam mezbûrenin cemî‘ terekelerine müte‘allıka âmme-i da‘vâdan karındaşım mezbûr el-Hâc Osman’ın zimmetini ibrâ ve iskāt etmiş idim. Lâkin zikr olunan girizme ve bağ yirmi ırgatlık olmayıp altı ırgatlık nâkıs olduğundan mâ‘adâ sulh-ı mezkûr esnâsında mezbûr el-Hâc Osman zevcim olan hâzır bi’l-meclis Mehmed’i haps ve dişlerini çıkarıp kerh etmekle zevcim mezbûre kerh olunduğuna binâen sulh olmuş idim, öyle olucak sulhum ikrâhen olmağla feshedip eşyâ-yı mezkûreyi terekesinden taleb ve da‘vâ ederim deyü eylediği noksân da‘vâsı hîn-i sulhda ırgatlığı şart ve tafsîl olunmayıp ve ikrâh dahi zâtına olmayıp zevcine olmağla [46] şer‘an mesmû‘a olmadığından gayrı mezbûrûn yedlerinde olup ibrâz eyledikleri i‘lâm-ı şer‘î mantûkunca müdde‘iye-i mezbûre Hadîce bundan akdem mezbûrûn ile Sadr-ı Rum fazîletlü semâhatlü efendi hazretleri dâ‘îleri huzûrlarında murâfa‘a olup kırk sene terk-i da‘vâ ve bilâ-özr-i şer‘iyye sükût eylediği ikrârıyla sâbit ve kırk sene bilâ-özr terk olunan mîrâs da‘vâsı istimâ‘ından hükkâm memnû‘lardır deyü efendi-i müşârün-ileyh i‘lâm eylediğini mezbûre Hadîce i‘tirâf eylediği ma‘lûm-ı devletleri buyruldukda emr ü fermân hazret-i men-lehü’l-emrindir. Fî 6 Zilhicce sene 1179.