İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 143 Hüküm no: 101 Orijinal metin no: [48-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çarıkçı Molla Ahmed’in et bedelinden dolayı Ali aleyhindeki alacak davasında anlaşılması ve birbirlerinin zimmetlerini ibra etmeleri Luhûm semeninden ibrâ Ma‘rûz, Sâhib-i arzuhâl Ali’nin hasmı Çeyrekçi Molla Ahmed meclis-i şer‘-i hatîrde kanadârı mezbûr Ali’den bey‘ için irsâl eylediği luhûm semeninden bâkī lede’l-mürâfa‘a iddi‘â eylediği iki yüz kırk guruşu yüz seksen guruşu bedel-i makbûz mukābelesinde sulh olup ziyâde altmış guruşa müte‘allıka da‘vâdan mezbûr Ali’nin zimmetini ibrâ etdikde ol dahi on aydan beri irsâl eylediği keçi etinin her kıyyesi için narh-ı rûzîsinden birer para ziyâde hesâb etmiş idi deyü eylediği da‘vâsından mezbûr Ahmed’in zimmetini ibrâ ve iskāt ve her biri ibrâyı kabûl ve kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî 26 min-Zilhicce sene 1179.